— Valoran a capacidade de superación do alumnado de 4º de ESO fronte ás dificultades de tipo persoal, educativas ou de contorno familiar e sociocultural

— A contía de cada premio increméntase un 25% nesta convocatoria

Un total de 20 estudantes de Educación Secundaria Obrigatoria (ESO) veñen de resultar galardoados cos premios da Xunta de Galicia ao esforzo e á superación persoal correspondentes ao curso 2021/22, tal e como poden consultarse no Diario Oficial de Galicia.

Estes galardóns, que cada ano convoca a Consellería de Cultura, Educación, Formación Profesional e Universidades, recoñecen a capacidade de superación destes alumnos que estudaron nese curso 4º de Educación Secundaria Obrigatoria e conseguiron superar as súas dificultades de tipo persoal, educativas ou do contorno familiar ou sociocultural, no marco dun ensino comprensivo e integrado. Para tal fin, a Consellería destina un total de 20.000 euros para estes premios a razón de 1000 euros por cada un dos 20 galardóns que se conceden, un 25% máis ca o ano pasado.

Cómpre subliñar que o obxectivo final destes galardóns é que os premiados sexan un exemplo para compañeiros en situacións similares, poñendo en valor o especial esforzo que supón acadar o éxito na escola para os estudantes que proceden de contornos socioculturais desfavorecidos, de contornos familiares disfuncionais, en proceso de superación de enfermidades crónicas ou con discapacidades que condicionan o seu rendemento escolar, a súa relación persoal ou a súa inserción social.

Relación de centros con estudantes galardoados:

Provincia	Concello	Centro educativo
A Coruña	Ames	IES Plurilingüe de Ames
A Coruña	Arteixo	IES Manuel Murguía
A Coruña	Carballo	IES Monte Neme
A Coruña	Culleredo	IES Rego de Trabe
A Coruña	Ferrol	IES Ferrol Vello
Lugo	Burela	IES Perdouro (dous premiados)
Lugo	Guntín	CPI Plurilingüe Tino Grandío
Lugo	Lugo	IES Nosa Sra. dos Ollos Grandes
Ourense	O Carballiño	IES Nº 1
Ourense	Ourense	CPI Plurilingüe José García García
Pontevedra	Cerdedo-Cotobade	IES de Cotobade
Pontevedra	Mos	CPR Plurilingüe Lar
Pontevedra	Mos	IES de Mos
Pontevedra	Sanxenxo	IES de Sanxenxo
Pontevedra	Tomiño	IES Antón Alonso Ríos (dous premiados)
Pontevedra	Vigo	IES Valadares (dous premiados)
Pontevedra	Vigo	CPR Plurilingüe Escuelas Nieto