As obras da contorna da igrexa de San Martiño de Cances e de eliminación de barreiras no barrio das Flores quedaron desertas e volverán a licitarse en breve
O Concello de Carballo pon en marcha os procedementos de contratación de tres obras de mellora da capa de rodaxe de tres vías rurais. Ata o 10 de xaneiro está aberto o prazo para as empresas interesadas na execución dos proxectos de aglomerado dende As Labradas (Carballo) ata A Ponte de Bértoa, cun orzamento de 142.639,07 euros, e dende Bolón (Sofán) ata Vilar de Francos (Artes), por 225.140,47 euros. E hoxe a Xunta de Goberno Local aprobou un terceiro proxecto, dende As Torres (Oza) ata Cances Grande, por 340.954,41 euros, que tamén sairá a contratación en breve.
Tamén haberá que volver a licitar as obras de acondicionamento da contorna da igrexa de San Martiño de Cances, que ten un orzamento de 126.156 euros, e de mellora da accesibilidade peonil no barrio das Flores e noutras zonas urbanas, por 287.071,81 euros, xa que ámbalas dúas quedaron desertas por non presentarse ningunha oferta.
A Xunta de Goberno tamén aprobou na sesión de hoxe a prórroga por un ano dos contratos de roza de vías nas parroquias e de aluguer de pala e camión, ademais do inicio do expediente de contratación dos traballos de mellora e posta e punto das zonas verdes, con reserva a centros especiais de emprego de iniciativa social, por 85.993,26 euros.
