· O IV concurso de tapas ‘Saborea Cariño’ dará esta fin de semana o pistoletazo de saída ás actividades organizadas.
· O sábado, 17 de decembro, tamén haberá a obra de teatro ‘Desconcerto’ de Culturactiva Producións.
O Concello de Cariño publicou a programación cultural para este Nadal, que comezará este venres, 16 decembro, e finalizará o sábado 7 de xaneiro e na que hai opcións para todas as idades e gustos, coa gastronomía, o teatro, o deporte, actividades e as visitas de Papá Noel e os Reis Magos como protagonistas.
O IV concurso de tapas ‘Saborea Cariño’ dará esta fin de semana o pistoletazo de saída ás actividades organizadas. Desde o venres, 16 de decembro, ata o domingo, 18 de decembro, os veciños e veciñas de Cariño poderán degustar as tapas que ofrecen os 9 locais participantes. A entrega de premios realizarase o venres 23 de decembro ás 18 horas no salón de plenos.
Este sábado, 17 de decembro, tamén haberá a obra de teatro ‘Desconcerto’, de Culturactiva Producións. Será ás 19:30 horas no auditorio municipal e a entrada é gratuíta.
O vindeiro venres, 23 de decembro, ‘As aventuras de Didi’ de Trémola Teatro chegará á biblioteca municipal. É unha obra dirixida a nenos e n iñas de entre 3 e 7 anos e haberá dous pases: ás 17 horas e ás 18 horas. Para asistir é necesario inscribirse previamente na propia biblioteca.
O sábado 24 de decembro Papá Noel chegará a Cariño para coñecer as últimas peticións dos máis pequenos. Estará na casa do concello de 17 a 19 horas. Pola súa banda, a cabalgata dos Reis Magos terá lugar, como é habitual, o xoves 5 de xaneiro, percorrendo todas as parroquias a partir das 17 horas e acabando o seu roteiro na casa do concello, onde atenderán as peticións dos nenos e nenas.
Para o martes 27 de decembro programouse unha xornada gratuíta de balonmán en familia, que terá lugar no polideportivo ás 16:30 horas. A programación tamén inclúe diferentes actividades como Láser Etiqueta (mércores 28 de decembro de 16:30 a 20:30 horas no polideportivo e con inscrición previa na Casa da Cultura), o deslizador ‘Tubby Xtrem’ e inchables infantís (os días 30 e 31 de decembro no polideportivo) ou unha sesión gratuíta de cinema o 4 de xaneiro coa proxección de ‘Canta 2’ no auditorio municipal ás 18:30 horas.
A programación teatral complétana o circo rueiro ‘Carman’ de Javier Ariza o 29 de decembro ás 18 horas na Praza Vermella e a obra ‘Vos fabulosos cleaners’ de Malasombra Producións, prevista para o 7 de xaneiro ás 18:30 horas no auditorio municipal.
Para a noite de fin de ano, o 31 de decembro, organizouse un baile na Praza Vermella que estará amenizado pola Orquestra #Finisterre e DJ Party.
