Os traballos, que terán un prazo de execución de seis meses, permitirán trasladar o servizo do Edificio A do complexo do Centro de Atención a Persoas con Discapacidade (CAPD) da Coruña, ao Edificio F, para contar con mellores instalacións
A Xunta sacou a licitación as obras para o acondicionamento do Punto de Encontro Familiar (PEF) da Coruña, que contarán cun investimento de preto de 540.000 euros. Esta reforma permitirá o traslado do actual emprazamento, no Edificio A do Centro de Atención a Persoas con Discapacidade (CAPD) da Coruña, ao Edificio F do mesmo complexo.
Así, as obras, que terán un prazo de execución de seis meses, consistirán en acondicionar unha parte da planta baixa deste novo edificio para garantir a súa independencia co resto da instalación e crear dúas áreas: unha de administración e outra de encontro familiar. Este procedemento determina os requisitos técnicos que terán que reunir as empresas interesadas, que deberán presentar a súa solicitude para facerse cargo dos traballos.
A Xunta está ampliando e mellorando a rede de Puntos de Encontro Familiar que hai en Galicia e que permiten garantir o cumprimento do réxime de visitas establecido xudicialmente en condicións de seguridade para todos os menores. Ademais desta mellora no da Coruña, este mesmo ano entrou en funcionamento o oitavo PEF, en Ribeira, que dá servizo á comarca do Barbanza.
