― Os técnicos do Plan de Control de Vertidos, dependente de Augas de Galicia, localizaron estes focos no marco das inspeccións rutineiras nas redes fluviais
― Os focos tiñan a súa orixe na rede municipal de desaloxo de augas pluviais na parroquia de San Xián de Torea e nunha rede de saneamento da parroquia de San Xoán de Serres, con vertido directo á marxe esquerda do río
― Nunha inspección recente, os técnicos autonómicos verificaron mediante analítica dos puntos de vertido que as actuacións executadas permitiron o cese do vertidos
A Consellería de Infraestruturas e Mobilidade, a través de Augas de Galicia, eliminou dous puntos de vertido de augas residuais nas parroquias de San Xián de Torea e San Xoán de Serres, no concello de Muros.
Os técnicos do Plan de Control de Vertidos, dependente de Augas de Galicia, localizaron estes focos no municipio, no marco das inspeccións rutineiras nas redes fluviais da Demarcación Hidrográfica Galicia-Costa.
O foco localizado na parroquia de San Xián de Torea correspondíase cunha rede de pluviais que vertía por infiltración no terreo. O segundo foco, localizado no lugar de Valdexería, na parroquia de San Xoán de Serres, tiña orixe nunha rede de saneamento con vertido directo á marxe esquerda do río.
Os técnicos da Xunta solicitaron ao Concello un plan de actuacións para eliminar as achegas contaminantes.
No caso San Xián de Torea, a emenda consistiu na conexión da condución cara ao novo sistema de depuración municipal implantado na zona. No segundo caso, a emenda das achegas contaminantes foi posible grazas á execución de rede separativa no lugar de Valdexería.
Os técnicos da Xunta realizaron recentemente unha nova inspección á zona, verificando mediante a toma de mostra o cese dos puntos de vertido e a inexistencia de afección á rede fluvial.
