O certame repartirá 600 euros en premios.
O concurso de tiktoks contra a violencia de xénero que organiza o Concello amplía o prazo para presentar os vídeos ata o día 9 de decembro ás 10:00 horas.
Este certame está incluído no programa municipal de actividades en torno ao 25 de novembro, o Día Internacional para a Eliminación da Violencia Contra as Mulleres. O propósito é concienciar sobre esta problemática social, promover a igualdade de xénero e impulsar a reflexión, a conciencia crítica e, ao mesmo tempo, a creatividade das persoas participantes.
O concurso vai dirixido tanto ao alumnado do IES Agra de Leborís -a partir de 13 anos de idade- como a calquera persoa maior de idade que estea empadroada no termo municipal da Laracha. Precisamente a elección da rede social TikTok vén motivada pola súa popularidade entre o público adolescente e xuvenil.
Para participar é preciso enviar un único vídeo, sexa individual ou grupal, a través do formulario que está dispoñible na web municipal www.alaracha.gal. A temática debe ser a establecida para o concurso, estar realizado na app TikTok, ter unha duración de entre un e tres minutos e incluír o hashtag #alarachaunidafronteasviolencias.
Os vídeos subiranse ao Instagram @xuventudealaracha o 10 de decembro. Aqueles que obteñan máis “gústames” ata o 21 de decembro ás 10:00 horas serán os gañadores dos seguintes galardóns:
• 1º premio: 300 euros.
• 2º premio: 200 euros.
• 3º premio: 100 euros.
A relación das persoas gañadoras farase pública na web e nas redes sociais do Concello o día 26 de decembro.
