Perto dun centenar de entidades de toda Galicia celebrarán na cidade o Día Internacional das Persoas con Discapacidade, coa sétima edición da iniciativa ‘Baixo o mesmo paraguas’
A concelleira de Benestar Social, Igualdade e Participación Cidadá, Yoya Neira, presentou esta mañá a sétima edición da iniciativa ‘Baixo o mesmo paraugas’, que encherá de paraugas de cores o Paseo do Parrote o próximo día 3 de decembro, ás 12:00 horas, para celebrar o Día Internacional das Persoas con Discapacidade. A convocatoria reunirá a máis dun centenar de asociacións e entidades de toda Galicia que representan a miles de persoas con discapacidade e as súas familias.
Na presentación do acto, Yoya Neira lembrou o compromiso do Goberno de Inés Rey coas persoas con discapacidade e puxo en valor o traballo das asociacións por ser “un apoio
imprescindible á hora de deseñar as políticas municipais de inclusión”.
Neira subliñou a importancia dunha iniciativa como ‘Baixo o mesmo paraugas’ porque demostra “que ante a diversidade todos temos que traballar xuntos do mesmo xeito que todas as entidades uníronse para reivindicar obxectivos comúns como a accesibilidade universal, a incorporación en igualdade ao mercado laboral e unha asistencia sanitaria inclusiva e eficaz”.
A responsable dos Servizos Sociais do Concello sinalou que outro dos obxectivos da popular paraguada é a loita contra a discriminación e lembrou que, segundo datos do INE, un de cada tres nenos discapacitados sentiuse discriminado na contorna escolar e unha de cada 10 persoas no ámbito laboral. “Contra a discriminación debemos loitar todos e todos os días”, subliñou.
A iniciativa ‘Baixo o mesmo paraugas’ terá lugar o vindeiro sábado 3 de decembro no Parrote ás 12:00 horas. O acto, no que está previsto a asistencia da alcaldesa, Inés Rey, e no que se lerá un manifesto reivindicativo, rematará co Concerto con Fusión, da compañía Píscore, un espectáculo de carácter festivo que pasa por diferentes estilos musicais, desde a música latina, o rock ou o reggae ata o pop ou o música disco.
