Alternativa dos Veciños de Arteixo alerta dos problemas que podería que podería ocasionarlle aos veciños residentes a reforma que pretende desenvolver o Goberno Municipal na Praza Galán, que se atopa situada no medio dos primeiros edificios da Urbanización Sol e Mar en Oseiro.
“Estivemos a falar sobre esta obra con moitos veciños residentes nos edificios que rodean a Praza Galán e, non están de acordo co proxecto de reforma desta praza, xa que pasaría de ser unha zona tranquila e descanso a ser unha zona actividade e de xogos para os nenos. Os veciños e veciñas teñen claro que pola súa localización, a Praza Galán non pode ser reformada para convertela nunha zona de actividade deportiva e zona de xogos. Precisamente, no seu día, foron os veciños os que instalaron unha fonte e uns bancos para evitar que esta praza fose utilizada como zona de xogo, xa que se atopa no medio dos edificios” apunta Noelia Martínez, voceira de Alternativa en Arteixo.
“Estamos a medio ano das eleccións e agora ao Goberno Municipal chegáronlle as présas. Están a desfacer o municipio e acometendo obras sen ningún tipo de control e supervisión. Como saben que na Urbanización Sol e Mar existe un importante cabreo da veciñanza pola negación do Goberno Municipal a realizar o desvío das liñas de alta tensión que atravesan a urbanización, é por iso que agora levan a cabo estas obras para tentar desviar a atención e volver enganar aos veciños” matiza Noelia Martínez.
