Alternativa dos Veciños de Arteixo denuncia as inundacións que se producen no novo parque central de Arteixo, que apenas hai uns meses que se inaugurou e parte da zona axardinada e algunhas instalacións xa se atopan nun estado lamentable. Alternativa lamenta as présas do Goberno Municipal en inaugurar obras sen ningún tipo de seguimento e control, como consecuencia da proximidade das eleccións municipais.
“En Galicia aínda non empezou a chover de verdade e o magnífico “Central Park” que nos vendeu o Partido Popular, xa empezou a inundarse. Isto sucede cando chegan as présas porque se achegan as eleccións e o único interese e inaugurar obras como sexa. Por certo, unhas obras ás cales non se lles realiza o pertinente seguimento e control por parte do concello. Esperemos que cando empece a chover de verdade, o Central Park non se converta nun Aquapark” apunta Noelia Martínez, voceira de Alternativa en Arteixo.
“Se algo quedo claro nestes últimos días onde caeron algunhas choivas, é que os traballos de drenaxe non se puideron realizaron correctamente, xa que se a estas alturas xa se producen tales inundacións, non nos queremos imaxinar como será en pleno inverno… Estamos a falar dunha obra que ascendeu á case un millón de euros e desde Alternativa dos Veciños non imos permitir que se xogue co diñeiro dos veciños e veciñas de Arteixo ” matiza Noelia Martínez.
