O obxectivo é evitar o paso de auga ao Paseo Marítimo durante a temporada invernal
O Concello da Coruña, a través da súa Concellaría de Medio Ambiente, comezou este luns os traballos para levantar na praia de Riazor a duna de area que protexerá o Paseo Marítimo dos posibles temporais costeiros da próxima temporada invernal. O obxectivo, como cada ano, é minimizar o impacto dos fenómenos costeiros no tráfico e nos elementos próximos.
A empresa responsable do servizo utilizará maquinaria especializada para levar a cabo os traballos, que transcorrerán ao longo desta semana. A duna superará os dous metros de altura e situarase na parte intermedia do areal, cunha separación de seguridade con respecto ao Paseo Marítimo.
Durante os próximos seis meses, o persoal de Medio Ambiente revisará de maneira continua esta estrutura para planificar posibles reforzos en caso de ser necesarios. Cada ano, en función dos temporais e fenómenos costeiros, lévanse a cabo unha serie de traballos para reconstruír este elemento de protección.
A duna de Riazor levantouse por primeira vez no ano 1995 como resposta a un forte temporal que derrubou a antiga balaustrada do Paseo Marítimo ao seu paso por este areal.
Este tipo de situacións meteorolóxicas danse entre unha e tres veces ao ano de media.
