San Sadurniño participou esta semana no programa “Onde vivimos” organizado pola Asociación Nuestra Señora de Chamorro co obxectivo de que as persoas usuarias do seu centro -6 delas veciñas nosas- coñezan un pouco mellor os concellos da comarca.
A concelleira de Igualdade, Araceli Bellas, e o alcalde, Secundino García, visitaron as instalacións situadas no Val para contarlles algunhas cousas sobre o noso municipio -situación, patrimonio e recursos turísticos máis destacados, servizos e programas que ofrece, etc.-, ademais de conversar coas usuarias e usuarios sobre outros temas do seu interese.
Durante estes días, o centro de Nuestra Señora de Chamorro recibiu a visita de representantes municipais de distintos municipios da zona co obxectivo de estreitar as relacións entre a entidade e os concellos e, máis que nada, seguir concienciando sobre a necesidade de inclusión e de apoio á autonomía das persoas con discapacidade intelectual.
Os usuarios e usuarias agasallaron o rexedor e a concelleira cunha camiseta deseñada e estampada no seu taller ocupacional. Secundino García e Araceli Bellas, pola súa banda, convidaron ao grupo a visitar San Sadurniño.
Podedes ampliar información sobre o traballo da asociación nesta ligazón: https://www.asociacionchamorro.org/
