— O orzamento da Consellería de Educación para este programa elévase a 1,6M€
— Na selección de centros deuse prioridade aos do rural e impúlsase a compra de fondos nas librerías máis próximas e material de atención á diversidade
A Xunta de Galicia vén de incorporar 25 novos centros educativos públicos ao Plan de Mellora de Bibliotecas Escolares (Plambe), tal e como publica o Diario Oficial de Galicia. Deste xeito, a rede de centros integrados neste programa chega este curso a 798 centros, dos que 754 son públicos e 44 concertados.
O orzamento destinado pola Consellería de Cultura, Educación, FP e Universidades a este plan elévase a 1,6€ para cubrir tanto os fondos destinados aos colexios e institutos de nova incorporación como aos que continúan participando na iniciativa.
Un ano máis a convocatoria dá prioridade aos centros do rural, de tal forma que, en igualdade de puntuación, teñen preferencia os situados en concellos de menor poboación. De feito, dos centros de nova incorporación, a meirande parte son de poboacións de pequena e mediana poboación. A listaxe dos mesmos é a que se reflicte na seguinte táboa:
| PROVINCIA | CONCELLO | CENTRO |
| A Coruña | A Coruña | CEE María Mariño |
| A Coruña | A Coruña | CEIP Plurilingüe Wenceslao Fernández Flórez |
| A Coruña | A Coruña | CEIP Novo Mesoiro |
| A Coruña | Boiro | CEIP Santa María do Castro |
| A Coruña | Ferrol | IES Ferrol Vello |
| A Coruña | Oleiros | CEIP Plurilingüe Isidro Parga Pondal |
| A Coruña | Porto do Son | CEIP Plurilingüe de Campanario |
| A Coruña | Ribeira | CEP Plurilingüe de Carreira |
| A Coruña | Santiago | CIFP Compostela |
| A Coruña | Santiago | IES Lamas de Abade |
| Lugo | Alfoz | IES Alfoz-Valadouro |
| Lugo | Cervo | CEIP Península da Paz |
| Lugo | Cospeito | CEIP Plurilingüe de Muimenta |
| Lugo | Monforte | CEE Infanta Elena |
| Lugo | Navia de Suarna | CPI Plurilingüe Navia de Suarna |
| Lugo | Outeiro de Rei | CEIP Laverde Ruíz |
| Ourense | Ourense | CEIP Plurilingüe de Seixalbo |
| Ourense | Verín | CEIP Plurilingüe Amaro Refojo |
| Ourense | Verín | IES García-Barbón |
| Pontevedra | Moaña | EEI do Con |
| Pontevedra | Moraña | CPI Plurilingüe Santa Lucía |
| Pontevedra | Nigrán | IES Escolas Proval |
| Pontevedra | Pontevedra | IES Sánchez Cantón |
| Pontevedra | Sanxenxo | CEIP de Portonovo |
| Pontevedra | Vigo | EPAPU Berbés |
As asignacións para as novas incorporacións estarán destinadas á actualización dos fondos documentais da biblioteca escolar, á renovación do mobiliario e outro equipamento necesario, así como para outros gastos de funcionamento. No caso dos centros integrados no programa en convocatorias anteriores, poderán destinar a asignación a fondos, a mobiliario e outros equipamentos (os incorporados nas convocatorias 2008-09 a 2012-13 e 2021-22) ou a gastos de funcionamento específicos da biblioteca (centros integrados na convocatoria de 2021/22).
A compra dos fondos realizarase, preferentemente, a través das librerías da zona de referencia do centro, e deberá incluír materiais destinados á atención da diversidade (libros e outros materiais destinados ao alumnado con dificultades específicas de aprendizaxe, necesidades educativas especiais, altas capacidades, alumnado inmigrante etc.). Así mesmo, a multiculturalidade e as diversas linguas con presenza no centro deberán ser convenientemente contempladas; e o 50% dos materiais adquiridos deberán ser en lingua galega. Ademais, poderase mercar con estas asignacións mobiliario específico e adaptado ás necesidades da comunidade educativa.
Por outra banda, os centros incluídos neste programa recibirán formación específica, así como asesoramento a través da asesoría de bibliotecas escolares da Consellería.
Plan LÍA
Esta convocatoria enmárcase no novo Plan LÍA (Lectura, Información e Aprendizaxe), a folla de ruta da Xunta que guía todas as actuacións nestes espazos ata o ano 2025. A nova estratexia constrúese sobre sete puntos ou áreas clave, como son o crecemento da rede de bibliotecas escolares de Galicia e a renovación dos seus recursos; a biblioteca social, incidindo nunha maior inclusión; a construción de redes de colaboración, avaliación e comunicación entre os axentes da sociedade lectora; o uso das bibliotecas como laboratorios creativos de aprendizaxe; o estímulo da lectura entre toda a comunidade educativa; a alfabetización mediática e informacional e a innovación metodolóxica formativa, impulsando novas pedagoxías en torno á propia biblioteca.
Cada un destes sete puntos clave desenvolveranse en diferentes liñas de actuación, que incluíran o reforzo de proxectos de éxito neste ámbito como o propio Plambe, así como o lanzamento de novas iniciativas.
