A iniciativa, promovida pola Asociación de Concellos do Camiño Inglés, busca dar a coñecer esta ruta entre os escolares
Uns oitenta alumnos e alumnas de 3º de Primaria do CEIP Francisco Vales Villamarín de Betanzos participaron no proxecto educativo “O Camiño Inglés na escola”, unha iniciativa da Asociación de Concellos do Camiño Inglés para sensibilizar aos estudantes de educación primaria dos 16 municipios polos que discorre esta ruta xacobea a través da difusión dos valores xacobeos.
A rapazada do CEIP Francisco Vales Villamarín, divididas en cinco grupos e en sesións de 50 minutos, estivo toda a mañá do pasado venres xogando co “Xogo da Oca do Camiño Inglés”, unha adaptación do popular xogo a esta ruta xacobea, con ilustracións co máis representativo de cada unha das etapas dende o punto de vista patrimonial, cultural e paisaxístico. A rapazada tiraba o dado e ía avanzando sobre o taboleiro mentres os dous monitores da Asociación de Concello do Camiño Inglés lles achegaban información sobre os distintos lugares polos que discorrían.
“O Camiño Inglés na escola” está promovido pola Asociación de Concellos do Camiño Inglés e conta co financiamento da Vicepresidencia Primeira e Consellería de Presidencia, Xustiza e Turismo a través de Turismo de Galicia. A asociación está formada por 16 concellos: A Coruña, Abegondo, Betanzos, Cabanas, Carral, Fene, Ferrol, Mesía, Miño, Narón, Neda, Ordes, Oroso, Paderne, Pontedeume e Santiago de Compostela.
