― A actuación, cun investimento de máis de 215.000 €, permitirá habilitar unha senda ao longo de algo máis de 1,5 quilómetros
― As obras forman parte das 39 intervencións de mellora da seguridade viaria que a Xunta vai executar este ano en cruzamentos ou treitos paralelos das rutas xacobeas coas estradas autonómicas, cun orzamento de preto de 1,8 M€
― O Goberno galego dálle así continuidade ás 70 obras que realizou o pasado ano nas marxes dos Camiños,ás que destinou 1,4 M€
A Xunta avanza nas obras de mellora de seguridade viaria na estrada AC-231, no treito coincidente co Camiño do Norte, ao paso polo concello coruñés de Sobrado.
Esta intervención, que comezou a semana pasada e supón un investimento de preto de 215.000 euros, céntranse na execución dunha senda de algo máis de 1,5 quilómetros de lonxitude, entre os puntos quilométricos 14+065 e 15+615.
O novo itinerario disporá de 2 metros de ancho, con chan seleccionado estabilizado pola marxe dereita da estrada e con gabia pola beira.
A actuación enmárcase nas 39 intervencións de mellora da seguridade viaria que a Consellería de Infraestruturas e Mobilidade vai executar este ano en cruzamentos ou treitos paralelos das rutas xacobeas coas estradas autonómicas, cun orzamento de preto de 1,8 millóns de euros.
A encomenda deste ano levarase a cabo nos distintos camiños e trazados da ruta xacobea en tres provincias galegas. Na provincia da Coruña están programadas un total de 11 actuacións; na de Lugo, 23; e na de Ourense, 5.
O Goberno galego dálle así continuidade ás 70 obras que realizou o pasado ano nas marxes dos Camiños, e ás que destinou 1,4 M€.
