Mércores 05 de Outubro de 2022

A Deputación apoia con 225.000 euros a programación de actividades do Auditorio de Galicia


A alcaldesa en funcións e concelleira de Acción Cultural, Mercedes Rosón, asinou hoxe co presidente da Deputación, Valentín González Formoso, o convenio para o financiamento de programas como as xornadas de ilustración e música contemporánea, o ciclo de Lied, a mostra Deber de Baltar, o Festival C, a semana do patrimonio invisible ou o apoio ás compañías de artes escénicas e de movemento.

A Deputación da Coruña apoia con 225.000 euros o Auditorio de Galicia de Santiago de Compostela para o financiamento da súa programación de actividades durante o ano 2022. O presidente da Deputación da Coruña, Valentín González Formoso, e a concelleira de Cultura do Concello de Santiago, Mercedes Rosón, asinaron esta mañá o convenio de colaboración entre ambas entidades acompañados do deputado de Cultura, Xurxo Couto.

A Deputación apoia así a programación de actividades con 225.000 euros, un 77,47% do orzamento total que o Auditorio dispón para este fin, que ascende a 290.418,20 euros, e que inclúe ao longo do presente ano unha ampla programación de concertos de música clásica e vangardista, xornadas de ilustración e música contemporánea, o ciclo de Lied, a mostra ‘Deber de Baltar. Medicina e compromiso’, o Festival C, a semana do patrimonio invisible ou o apoio ás compañías de artes escénicas e de movemento.

Mercedes Rosón agradeceu a colaboración económica da Deputación “para facer posible unha importante programación cultural que é atractiva, diversa e de calidade e que ten o obxectivo de situar Compostela como núcleo de formación e ocio da provincia”.

Pola súa banda, Formoso destacou a “gran labor cultural que desenvolve o Auditorio cunha ampla programación de concertos, actividades didácticas e culturais e exposicións para todos os públicos, que ten unha importante difusión alén do propio termo municipal de Santiago de Compostela”.