Visitarán os establecementos e os recursos termais das catro provincias galegas, así como Santiago de Compostela, a Ribeira Sacra e as Rías Baixas
Un grupo de representantes dos principais operadores turísticos especializados en turismo de saúde de Noruega visitan estes días a Comunidade galega co obxecto de coñecer a súa oferta termal no ámbito dunha viaxe organizada por Turismo de Galicia en colaboración coa Asociación Balnearios de Galicia.
Os participantes nesta viaxe representan respectivamente as compañías Vin & Matglede, Eurotravel, Sør Vest Reiser e Senior Travel. Ademais, acompáñaos nesta viaxe un xornalista do xornal Østfoldavisen.
Os operadores turísticos noruegueses chegaron onte e fixeron unha visita a Tui, vila histórica cuxo casco antigo foi declarado conxunto histórico- artístico no ano 1951. E coñeceron o balneario de Cuntis, así como o hotel Termas de Cuntis.
Visita a Lugo
Hoxe venres, os axentes turísticos de Noruega farán un tour pola cidade de Lugo, con visitas á Catedral de Santa María, á praza Maior, á Domus de Mitreo e á Muralla Romana, declarada Patrimonio da Humanidade pola UNESCO no ano 2000.
Logo deste percorrido pola cidade, os visitantes achegaranse ata o Balneario de Lugo, onde poderán coñecer as súas instalacións así como as termas romanas situadas no complexo termal.
Ribeira Sacra
Mañá sábado, os operadores turísticos convidados por Turismo de Galicia para coñecer a oferta termal de Galicia visitarán a Ribeira Sacra, destino turístico que aspira a converterse en Ben Patrimonio da Humanidade e que alberga a meirande concentración de cenobios e mosteiros de Galicia.
Nesta contorna, visitarán unha adega da Denominación de Orixe Protexida Ribeira Sacra, o miradoiro dos Balcóns de Madrid, así como os mosteiros de Santo Estevo de Ribas de Sil e San Pedro de Rocas. Ao final da tarde achegaranse ata o complexo Laias Caldaria Hotel Balneario para visitar as súas instalacións e gozar dos seus tratamentos termais.
As Rías Baixas e Santiago de Compostela
Na súa estadía en Galicia, o próximo domingo, está previsto que os operadores turísticos noruegueses se acheguen ata as Rías Baixas para visitar a vila de Sanxenxo, a praia da Lanzada e Cambados, ademais de embarcarse nun pequeno cruceiro pola Ría de Arousa.
Xa pola tarde, os visitantes de Noruega trasladaranse á cidade de Santiago de Compostela para visitar a Catedral e as súas cubertas. Logo, achegaranse ata o Hotel Balneario de Compostela, en Brión, para coñecer as súas instalacións e recursos termais.
A estadía dos operadores turísticos noruegueses rematará o luns, día 21 de setembro, cando partirán cara os seus lugares de orixe.
Mercado noruegués
O mercado noruegués experimentou, nos primeiros sete meses deste ano 2015, un importante incremento dos seus niveis de demanda no segmento hoteleiro de Galicia, superando nun 15,9% a cifra de viaxeiros aloxados e nun 11% o nivel de pernoitas do mesmo período do pasado ano.
