Coa publicación das bases no Boletín Oficial da Provincia, este mércores ábrese un prazo de 20 días naturais para a presentación de solicitudes
O Concello de Neda vén de convocar as axudas municipais para a promoción de actividades culturais e deportivas dirixidas a entidades, asociacións e persoas físicas. Unha liña de subvencións en concorrencia competitiva. O Boletín Oficial da Provincia publicaba onte as bases, co que se abre o prazo de presentación de solicitudes -durante 20 días naturais a contar a partir de hoxe mércores, 10 de agosto-. Para optar ás mesmas, é preciso presentar a correspondente instancia, acompañada dunha serie de documentación, no rexistro xeral municipal.
As axudas están dirixidas a asociacións, persoas físicas, xurídicas, públicas ou privadas, agrupacións veciñais ou comités organizadores, entre outros, e o periodo que se terá en conta para a realización das actividades será dende o 1 de xaneiro ata o 31 de decembro deste 2022. Así mesmo, as accións susceptibles de subvención deben encadrarse preferentemente no termo municipal, ou no caso de efectuarse fóra deste, deberá tratarse de actividades que suplan ou complementen ás atribuídas ao Concello.
Unha vez concedidas, o prazo de xusficación das subvencións será de 2 meses e, en todo caso, antes do 31 de marzo do 2023 (salvo petición e concesión de prórroga).
