A achega económica suscrita esta mañá polo vicepresidente da Deputación e o alcalde ascende a 248.000 euros, o 80% do investimento necesario para a adquisición das novas instalacións, IVE excluído
Trátase dun entresollado e un baixo que suman case 1.700 metros cadrados de superficie e que se dedicarán a oficinas na parte superior e a garaxe e almacén na inferior
O vicepresidente da Deputación da Coruña, Xosé Regueira, e o alcalde de Fene, Juventino Trigo, subscribiron esta mañá o convenio nominativo para financiar a adquisición por parte do Concello dun baixo e un entresollado situados na confluencia do Camiño da Casa Nova con Naturais de Fene. Trátase dunha construción triangular cuxa parte inferior, de 809 m2, se ten previsto dedicar a estacionamento de vehículos municipais, mentres que a superior -de 883 m- se acondicionará para acoller varios servizos, aliviando deste modo os problemas de espazo que padece neste momento a Administración local. O importe da compra acordado cos propietarios xa o ano pasado ascende a 310.000 euros máis IVE, dos que a Deputación achegará 248.000 -o 80%-, mentres que o Concello de Fene porá con recursos propios o 20% restante, ademais dos custes rexistrais e do valor engadido.
A sinatura do convenio económico coa Deputación da Coruña é un paso máis para facer realidade un proxecto no que o Concello de Fene leva traballando case dous anos co obxectivo de solventar a falla de espazo, as deficiencias e os problemas de accesibilidade detectados en varias dependencias, como é o caso do Xulgado de Paz, os servizos de Promoción Económica e Turismo ou o departamento de Formación e Emprego, situado nun primeiro andar sen ascensor.
Estes tres servizos serán os que, en principio, se trasladarán ao novo entresollado que escriturará proximamente o Concello, situado a pouco máis de cen metros da sede consistorial. Ademais, o Goberno local tamén ten intención de levar para o novo edificio todo o arquivo municipal, que nestes momentos ten a maior parte dos seus fondos gardados nun espazo alugado.
Con 883m2 de superficie diáfana, o inmoble ten sitio máis que dabondo para ese cometido “e incluso podería acoller máis servizos se fose necesario”, comentou Juventino Trigo. O alcalde destaca “a boa situación” das futuras oficinas que, segundo describiu, “quedan moi preto da Casa do Concello e á beira de Naturais de Fene, unha das nosas principais avenidas. Pero para nós un dos principais valores do sitio, ademais do espazo, é que ten acceso a nivel desde a rúa Camiño da Casa Nova, o que sen dúbida mellorará a accesibilidade da veciñanza que teña que facer calquera xestión”.
310.000 euros máis IVE de investimento
O acordo alcanzado cos propietarios inclúe tamén o baixo de 809 m2. Esta superficie terá como primeira función ser garaxe dos vehículos da Policía Local e de Protección Civil, aínda que tamén “é susceptible de empregarse como espazo de almacenamento”, avanza Trigo ao tempo que engade que ambos recintos requirirán o seu acondicionamento antes de poder ser utilizados.
O alcalde incidiu “na boa disposición” que tiveron os titulares dos dous inmobles -a edificación é toda unha peza, pero con referencias catastrais distintas para o baixo e o entresollado- “para que o Concello tivese oportunidade de comprar e por un prezo certamente axeitado”.
Juventino Trigo lembra que os propietarios propuxeron unha cantidade de 310.000 euros máis IVE, unha cifra “sensiblemente inferior ao que sería o prezo de mercado”, tal e como asegura o alcalde e como reflicte o informe técnico de valoración que acompañou o acordo plenario adoptado en novembro de 2021 para solicitar a colaboración provincial.
A achega da Deputación da Coruña asinada hoxe a media mañá polo seu vicepresidente, Xosé Regueira, e por Juventino Trigo, ascende a 248.000 euros, o que supón o 80% da base impoñible da compra. O 20% restante, así como os gastos rexistrais, notariais e de impostos, serán asumidos polo Concello con fondos propios.
A axuda farase efectiva en dúas veces: 99.200 euros con carácter inmediato, unha vez que se achegue a documentación solicitada pola Deputación, e os 148.800 euros restantes no momento en que se escrituren os inmobles e consten inscritos no inventario municipal.
