Luns 08 de Agosto de 2022

O Plan Director do Parque do Pasatempo propón incorporar novos usos ao recinto compatibles cos seus valores patrimoniais


— O documento afonda no coñecemento do Parque, nas súas condicións actuais e define as liñas de actuación futuras para a súa conservación

— A directora de Patrimonio Cultural, Mª Carmen Martínez Ínsua, salienta que se enmarca no firme compromiso do Goberno galego con este Parque despois de ter impulsado a súa declaración BIC para garantir a súa posta en valor

— A directora de Turismo de Galicia, Nava Castro, lembrou que a Xunta investirá más de 1,5 millóns de euros neste espazo a través do Plan Xacobeo Next Generation

A Xunta presentou hoxe o Plan director do Parque do Pasatempo, a folla de ruta para o mantemento e conservación preventiva deste espazo que, entre as súas propostas, incorpora novos usos compatibles cos seus valores culturais.

No acto participaron os directores de Turismo, Cultura e Patrimonio Cultural, Nava Castro, Anxo M. Lorenzo e Mª Carmen Martínez Insua, xunto ao delegado territorial da Xunta na Coruña, Gonzalo Trenor. Como indicou a directora xeral de Patrimonio Cultural este documento é froito do traballo emprendido nos últimos anos por parte do Goberno autonómico para a posta en valor do Parque do Pasatempo e que se iniciou coa declaración BIC deste espazo aprobada no ano 2020.

“Para seguir dando pasos na súa recuperación, o ano pasado o Goberno autonómico contratou a redacción desta folla de ruta para afondar no seu coñecemento, nas súas condicións actuais e definir as liñas de actuación futuras para a súa conservación”, indicou a representante da Consellería de Cultura, Educación, FP e Universidades. Trátase dun documento que agora se traballará co Concello de Betanzos para o que se proporá un calendario de reunións.

Pola súa parte, a directora de Turismo de Galicia, referiuse ao investimento de 1,5 millóns de euros no desenvolvemento deste plan, dentro das achegas do Plan Xacobeo Next Generation, para o que se desenvolverá tamén un convenio de colaboración co Concello de Betanzos.

Planificación global
O equipo técnico encargado da elaboración do Plan realizou un intenso proceso de investigación, inventario e análise de patoloxías, apoiado en probas para o estudo dos materiais, dos sistemas construtivos. Como resultado, o documento ofrece unha planificación global que ten en conta os elementos urbanísticos e arquitectónicos de Betanzos, entre outros aspectos, e conta con varias liñas de actuación. Entre outras cuestións, inclúe unha proposta de plan de mantemento e conservación preventiva con actividades, actuacións e intervencións materiais periódicas que se consideran necesarias para garantir o mantemento e conservación do Parque.

O documento tamén pon o foco nos usos do Parque e define algunhas actividades futuras para o monumento sempre baixo criterios de compatibilidade cos seus valores culturais, incluíndo a organización de obradoiros e actividades que permitise darlle usos educativos, formativos e de investigación, entre outros.

O novo plan director ten, ademais, cun apartado de actuación en restauración e recuperación, accesos e accesibilidade, xardinería e paisaxe, instalacións e equipamento social, cultural e turístico. Entre elas, salienta un área de mantemento, un espazo de participación, entre outras. O Plan Director incorpora a investigación, o coñecemento e a participación veciñal.

Deja un comentario