• O alcalde de Cerceda lembrou a importancia de manter e impulsar esta festa como patrimonio histórico do municipio
• Asegurou que son moitos os veciños e veciñas que xa reservaron espazo pero tamén os turistas de toda Galicia que se achegarán ao concello esta fin de semana
• Será o 30 de xullo, tras dous anos parón pola COVID e non faltarán a gastronomía a animación infantil e a música
O alcalde de Cerceda, Juan Manuel Rodríguez, presentou hoxe a programación da Festa do Cochiño que terá lugar o vindeiro 30 de xullo, tras dous anos de parón pola Covid-19. O evento está organizado polo concello coa colaboración da Deputación da Coruña. Asegurou que xa son máis de 1.200 as persoas que xa reservaron espazo ou mercaron a venda anticipada polo que espérase unha masiva afluencia de público a gran festa do verán.
O alcalde destacou esta festa como un patrimonio histórico de todos os cercedenses que o concello manterá e impulsará. Lembrou, ademais, a gran cantidade de persoas foráneas que se darán cita esta fin de semana no Acevedo.
Unha das citas gastronómicas e culturais máis esperados do verán regresa a Cerceda dous anos despois. O polígono do Acevedo acollerá animación, música e por suposto a famosa preparación culinaria, o cochiño.
A xornada festiva arrincará co grupo Faíscas da Pontraga, que actuará durante todo o día. Sobre as 14.00 horas comezará a ansiada degustación do cochiño, e outros produtos como churrasco, polo ou o polbo.
De xeito paralelo ao festín haberá inchables de balde para os máis pequenos de 15.30 a 19.30 horas que poderán compatibilizar cun baño no Aquapark.
E non faltará a música coa actuación das orquestras Panorama e Os Satélites, que amenizarán a verbena ata a madrugada.
As racións custarán 13 euros e farase venda anticipada e reserva de sitio no propio consistorio, no centro de saúde da Silva e no centro social O Moucho.
