A quinta edición da Mostra Internacional de Teatro, MIAT, desenvolverase no areal do 28 ao 31 de xullo
As dúas funcións diarias programadas celebraranse con entrada libre ata completar capacidade
O Concello achega de novo o teatro á cidadanía cunha oferta variada e de calidade
A praia de Santo Amaro converterase de novo no privilexiado escenario que acollerá a representación das oito obras teatrais incluídas nunha nova edición da Mostra Internacional Área de Teatro (MIAT). O festival, que terá carácter gratuíto, desenvolverase no areal coruñés do 28 ao 31 de xullo, con dúas representacións diarias.
Será a quinta edición de MIAT, que se consolidou como un referente e cita ineludible para a cultura e o teatro no verán coruñés, dando cabida a unha variada oferta teatral nun marco incomparable como é a praia de Santo Amaro, que se converterá nun singular e privilexiado escenario durante os últimos catro días deste mes. Como é habitual, todas as sesións teatrais serán de balde e a entrada será libre ata completar a capacidade dispoñible.
A programación desta edición iniciarase este xoves, 28 de xullo, ás 17.00 horas, coa representación a cargo de Teatre Blau da ‘Vida secreta de Tenesse Williams’, unha obra intimista a través da que se poderá afondar na figura deste dramaturgo norteamericano, da man do actor Marti Pera Ferrer. A sesión nocturna, das 23.00 horas, correrá a cargo da compañía galega Vaiembora, que poñerá en escena a obra ‘Cariño’, abordando temas como o amor tóxico e a dependencia emocional, especialmente desde a perspectiva dos adolescentes.
O venres 29 ás 17.00 horas poñeranse en escena ‘Quixote’, obra dirixida a público infantil a cargo da compañía Pedras de Cartón, que aborda a obra de Cervantes en clave de comedia e a través da relación entre Sancho Panza e o propio Quixote. Ás 23.00 horas a compañía Barrosanta representará ‘Ragazzo’, que se expón como unha oda á mocidade, á liberdade e á dignificación das persoas.
Xa o día 30 ás 17.00 horas presentarase ‘Fatum’, unha obra especialmente visual a cargo da compañía O Catre Teatro, que aborda o debate sobre se a vida é un conxunto de accións fortuítas, casuais e ao azar ou está rexida por un destino inmutable e escrito. Ese mesmo día, a partir das 23.00 horas, poñerase en escena ‘El matrimonio Palavrakis’, coa compañía navarra El Puntido teatro, que conta a turbulenta vida conxugal de Elsa e Mateo, vítimas de malos tratos desde a infancia ata o final das súas vidas.
O último día da mostra, o 31 de xullo, pecharase con outras dúas representacións. Ás 17.00 horas está programada a obra en clave de humor ‘Ano 0 Antes de Cristo’, a cargo de Espazo Amateur Feteagal e Allegro Teatro. Xa ás 23.00 horas será ‘Running’, a cargo da compañía galega De Ste Xeito, a que pechará a programación cunha parodia sobre o actual ritmo de vida.
Deste xeito, a praia de Santo Amaro volverá ser o escenario que permita achegar o teatro a todo tipo de públicos, tanto infantil como adulto, cunha variada e atractiva oferta, que converten ao areal e a MIAT nunha cita no verán coruñés, e que se enmarca dentro das políticas de promoción cultural postas en marcha polo executivo de Inés Rey.
