Os dous faros máis antigos do mundo aínda en funcionamento traballan cara un irmandamento
Os perfiles de redes sociais das dúas entidades realizarán publicacións conxuntas para difundir a historia da Torre e da Lanterna
A Torre de Hércules, o faro máis antigo do mundo aínda en funcionamento, e a Lanterna di Genova, o segundo na lista e o máis antigo do Mediterráneo, están a colaborar nun proxecto polo seu irmandamento.
Desde este venres os perfís en redes sociais das dúas entidades traballarán conxuntamente, colaborando para difundir a historia, curiosidades e datos dos monumentos. A través de diversas publicacións mensuais, os seguidores poderán coñecer máis sobre os elementos en común que unen ao faro da cidade italiana co da cidade da Coruña.
Entre eles, o vínculo de ámbalas dúas urbes coa emigración, as súas reconstrucións e reinvencións sufridas ao longo da historia, a súa relación coa contorna natural, tanto terrestre como marítima, a súa identificación como símbolos das cidades nas que están erixidos e, por suposto, a súa relevancia como sinais marítimos e instrumentos de navegación, tanto no Atlántico como no Mediterráneo.
Os primeiros traballos conxuntos comezaron no pasado mes de marzo, cando unha expedición de Xénova acudiu á Coruña e puido coñecer a Torre de Hércules en persoa. No mes de maio, ámbolos dous faros ilumináronse de azul no día 9, polo Día de Europa, reforzando a colaboración entre a Torre de Hércules e a Lanterna di Genova.
Sobre o Consorcio de Turismo e Congresos da Coruña
Turismo da Coruña é un consorcio formado polo Concello da Coruña, a Cámara de Comercio, Industria e Navegación, e a Autoridade Portuaria da Coruña, cuxa labor é converter o turismo nun dos motores económicos da cidade herculina. O ente é o responsable da promoción e comercialización da cidade nos ámbitos nacional e internacional e participa na creación de produtos que aporten unha maior calidade e atractivo á oferta turística da mesma. Precisamente, e co obxectivo de pór o seu maior esforzo no servizo ao turista, este organismo conta cunha oficina central, dous Puntos de Información turística no centro da cidade e outro, de Atención ao Cruceirista. Na actualidade, o Consorcio de Turismo e Congresos diríxeo como presidente o primeiro tenente de alcaldesa e Concelleiro de Relacións Institucionais, Turismo e Seguridade Cidadá, Juan Ignacio Borrego, e como director xerente Moisés Jorge Naranjo, e conta cun equipo técnico de informadores e informadoras, especialistas en promoción turística e persoal administrativo.
