― O luns comezarán os labores na OU-801, ao seu paso polo concello ourensá de Padrenda
― Darase continuidade ás tarefas nas estradas da provincia da Coruña: AC-441 en Vimianzo; AC-432 en Camariñas; AC-552 en Dumbría; AC- 413 en Ordes; AC-549 en Noia, e na vía de altas prestacións CG-1.5 Brión-Noia, tras rematarse os labores na AC-550 en Cee
― Proseguirase cos traballos na PO-400, ao seu paso polo concello pontevedrés de Crecente
― As actuacións contribúen á eliminación de especies que aumentan o risco de lume e á mellora da seguridade viaria, ao incrementar a visibilidade
― Mediante estes traballos retiraranse máis de 5.600 árbores situadas no dominio público das estradas, susceptibles de provocar lumes ou de supoñer un risco de caída na calzada, e repararanse 22.500 metros lineais de valado dos noiros perimetrais das estradas
― Coa nova encomenda a Seaga, desde o ano 2018 a Xunta leva investidos 8,3 M€ nas actuacións de control da biomasa nas marxes das estradas da súa competencia
A Xunta iniciará este luns novo traballos de limpeza nas marxes das estradas autonómicas das provincias de Ourense, da Coruña e de Pontevedra.
A Consellería de Infraestruturas e Mobilidade retomou esta pasada semana estes traballos nas vías da Xunta, tras renovar, por máis de 2,2 millóns de euros coa empresa pública Seaga, o contrato para acometer tarefas de control da biomasa das marxes das estradas autonómicas para previr lumes e reforzar a seguridade viaria.
En concreto, este vindeiro luns comezarán os labores de roza e limpeza nas marxes da estrada OU-801, ao seu paso polo concello ourensán de Padrenda.
Tamén, durante a vindeira semana darase continuidade as tarefas de limpeza nas marxes das estradas da provincia da Coruña: AC-441, en Vimianzo; AC-432, en Camariñas; AC-552, en Dumbría; AC- 413, en Ordes; AC-549 en Noia; e na vía de altas prestacións CG-1.5 Brión-Noia. A pasada semana rematáronse, ademais, as tarefas de limpeza nas marxes da AC-550, ao seu paso polo municipio de Cee.
En paralelo, proseguirase cos traballos de control da biomasa nas marxes da estrada PO-400, no seu percorrido polo concello pontevedrés de Crecente.
Estas actuacións contribúen, por unha banda, á prevención dos lumes, ao eliminar especies pirófilas como o piñeiro, o eucalipto ou a acacia nas marxes das vías de titularidade da Xunta. Cómpre lembrar que a Lei 3/2007, de 9 de abril, de prevención e defensa contra os incendios forestais de Galicia recolle o obxectivo da rotura da continuidade horizontal e vertical da biomasa, de modo que as estradas actúen con efecto “cortalumes”.
Por outra banda, estas intervencións favorecen o control da vexetación, que tamén supón a mellora da seguridade viaria. Os traballos proxectados retirarán árbores que poidan caer á calzada en caso de temporal e evitarán vexetación que invada as beiravías ou beirarrúas, facilitando o tránsito de peóns e ciclistas. Tamén permiten aumentar a visibilidade dos usuarios da estrada e conseguen o efecto de alonxar aos animais, como xabarís ou corzos das vías.
A nova encomenda a Seaga ten unha vixencia de doce meses e impulsa o despexe e roza de vexetación na zona de dominio público das estradas autonómicas. Ademais, tamén supón un apoio aos labores de conservación de zonas verdes en sendas peonís e glorietas.
Estas novas accións de conservación nas vías de titularidade da Xunta permitirán, durante o desenvolvemento desta nova encomenda, a roza mecánica de máis de 2.600 quilómetros lineais e actuar nunha superficie de máis de 188.500 metros cadrados de xeito manual.
Ademais, mediante os traballos desta encomenda retiraranse máis de 5.600 árbores situadas no dominio público das estradas, susceptibles de provocar lumes ou de supoñer un risco de caída na calzada. Tamén se levará a cabo a reparación de 22.500 metros lineais de valado dos noiros perimetrais das estradas.
Como novidade na encomenda de 2022 está previsto a reposición de 7.500 metros de valado en vías de alta capacidade que se poida danar nos labores de despexe ou roza. A reposición realizarase con valado reforzado para aumentar a protección da estrada fronte á entrada de animais.
O departamento que dirixe Ethel Vázquez intensificou nos últimos anos as accións de prevención de lumes nas marxes das estradas autonómicas, engadindo aos medios da súa conservación ordinaria un reforzo con encomendas á empresa pública Seaga.
Con esta nova encomenda, desde o ano 2018 lévanse investidos 8,3 M€ nas actuacións de control da biomasa nas marxes das estradas autonómicas.
