Alternativa dos Veciños de Arteixo reunirase mañá coa Xefa do Servizo de Explotacións Agrarias parar tratar a situación da granxa porcina que se sitúa no lugar de Arcas na parroquia de Lañas.
Alternativa dos Veciños e a veciñanza afectada levan meses loitando para que o propietario da granxa regularice a explotación, xa que teñen os animais nunhas condicións pésimas e tamén incumpren as normativas ambientais e de seguridade.
“O propietario comprometeuse a regularizar as numerosas irregularidades que presenta a explotación, pero o único que fixo ata a data foi reparar o pozo de xurros e reparar un anaco do valo que cerra a balsa de polietileno.
A día de hoxe e logo das numerosas denuncias realizadas, seguen vertendo xurros para a balsa aberta de polietileno, o cal provoca un cheiro insoportable e unha praga de insectos, que afectan gravemente á saúde e calidade de vida dos veciños que residen nos arredores da granxa“ apunta Juanfran Martínez, coordinador de Alternativa en Arteixo.
“Sairemos á rúa a demandarlle ás diferentes administracións e organismos competentes, que obriguen ao propietario a regularizar a explotación e a cumprir estritamente coas normativas vixentes” matiza Juanfran Martínez.
