– Denuncian que, tras sete anos de mandato de UxC – PSOE, Cambre continúa e continuará sen Plan Xeral de Ordenación Municipal por vontade do goberno, a pesar de que o alcalde, Óscar García Patiño, comprometeus cos veciños para ter o mesmo aprobado no presente mandato.
– Lembran que o actual alcalde e o seu concelleiro de Urbanismo pedían en 2013 a dimisión do ex alcalde do PP, Manuel Rivas, se non aprobaba o Plan en catro anos, polo que esixen que se actúe en consecuencia e expliquen aos veciños por que aqueles esquivan agora o seu propio criterio.
Tras sete anos de mandato, o goberno de Cambre UxCPSOE incumpriu a súa promesa de aprobar o Plan Xeral no presente mandato e veu eludindo deliberadamente os prazos anunciados en prexuízo de todos, coa consecuencia de que, a día de hoxe, non existe sequera documento inicial.
Destaca a formación popular que é absolutamente prioritario un Plan Xeral de Ordenación Municipal que dote de seguridade xurídica ao crecemento urbanístico, que garanta as dotacións e os espazos libres de forma sostible e que regule con trasparencia o uso dos terreos e a edificación, as cales se seguen ordenado – recalcan – mediante unhas Normas Subsidiarias das que o goberno municipal “ sérvese a capricho” e que datan de 1994, polo que non están adaptadas á actual regulación do Chan, o que proba o obsoleta, abusiva e inoperativa ordenación do territorio á que nos ten sometidos o actual goberno municipal.
“Cambre necesita desenvolverse racionalmente, pero ao goberno bipartito non lle interesa un Plan Xeral e, por iso, non fai outra cousa que demorar o seu avance, defraudando as expectativas dos cidadáns que confiaron nuns representantes que claramente lles mentiron” – Afirman.
Sinalan que Cambre non pode permitirse “quedar atrás” e debe adaptarse aos tempos, para o que é elemental erradicar sistemas de regulación urbanística imprecisos e precarios como os son o uso de “Normas Subsidiarias a demanda da autoridade política” e non do interese xeral dos veciños, que é intrínseco aos Plans Xerais.
“O goberno de Cambre non ten un proxecto de futuro, polo que continuará urbanizándose a base de “plans reducidos” e en base a actuacións a conveniencia, que só conducen a un ineficiente desenvolvemento, que non se mostra desexable nin idóneo para un municipio que roza xa os 25.000 habitantes” – Sentencian.
Así mesmo, lembran que o propio alcalde de Cambre, Óscar García Patiño, e o seu actual concelleiro de Urbanismo, Juan Leirós, esixían anticipadamente a dimisión do anterior rexedor popular, Manuel Rivas, se este non aprobaba devandito Plan en catro anos, polo que requiren ao goberno local que explique aos veciños “Que responsabilidades deberían estes esixirlle ao actual goberno transcorridos sete anos sen Plan e por que non actúan en consonancia co seu propio discurso “
