O obradoiro de Estimulación da mente – Memoria estará subvencionado pola Deputación da Coruña
A inscrición para os obradoiros da terceira idade xa se pode levar a cabo no Departamento de Servizos Sociais do Concello de Riveira. Estas actividades, que se atopan dentro do Programa de Dinamización e Promoción social dos nosos maiores, estaranse a realizar durante todo o ano tanto en Riveira como nas diferentes parroquias e teñen un custe totalmente gratuíto para os veciños.
Trala gran acollida que estes obradoiros tiveron a edición pasada, este ano amplíanse tanto as prazas como a oferta, na que, ademais de ter bailes de salón, ximnasia de mantemento (anteriormente vinculada ó departamento de deportes), reforzo e estimulación da mente – memoria, xurden novidades como o obradoiro de galego, impartido polo departamento de normalización lingüística do concello, o obradoiro de inglés, impartido por un grupo de voluntarios e o de artes plásticas.
Ademais da optimización dos recursos municipais, os obxectivos que se pretenden acadar son o fomento da calidade de vida e a saúde das persoas maiores, así como a impulsión e participación comunitaria e a integración social do colectivo da Terceira Idade.
Estes programas de envellecemento activo, que se veñen a realizar dende o ano 2004, promoven o benestar subxectivo e pretenden conseguir que os cambios de conduta sexan saudables grazas ó traballo dentro de tres áreas fundamentais: física, psicolóxica e social.
A matrícula poderase realizar durante todo o mes de setembro, en horario laboral, no Departamento de Servizos Sociais.
