Os obradoiros de marisqueo contaron neste 13 de xuño coa participación dunha corentena de alumnos e alumnas de 1.° da ESO do IES Leliadoura de Ribeira.
A súa estadía na Pobra do Caramiñal tivo como punto de partida o Auditorio do Museo Valle-Inclán, onde unha das técnicas do Turismo do Concello lles ofreceu unha explicación do cometido da actividade e asistiron á proxección dun vídeo que amosa a cadea pola que pasan os recursos marisqueiros. Trala entrega dos receitarios que aglutinan as diferentes elaboracións que se fan con bivalvos nos establecementos hostaleiros da localidade, chegou o momento de desprazarse ata a praia dos Areos para coñecer in situ o proceso extractivo da man das mariscadoras.
Mediante estas visitas-experiencia dirixidas a centros educativos de toda Galicia, a Concellaría do Turismo, da cal é titular a edil Charo Varela (Nós Pobra), coa colaboración da Asociación Mar da Pobra, busca achegarlles ás xeracións máis novas o oficio das mariscadoras e fomenta-lo respecto polo mar, polo traballo neste eido e polo medio natural, ao tempo que se contribúe con esta acción á desestacionalización da demanda turística.
