• Trátase da zona verde anexa á casa do concello, o paseo marítimo, a rúa Río Sor e a de acceso ao IES Cabo Ortegal.
• O proxecto, financiado a través do Plan Único da Deputación, está actualmente a licitación pública e o prazo de presentación de ofertas finaliza o 27 de xuño.
O Concello de Cariño sacou a licitación pública un proxecto, valorado en 125.410,16 euros, para levar a cabo melloras de accesibilidade en diferentes espazos públicos do municipio. A actuación, financiada a través do Plan Único da Deputación dá Coruña, levará a cabo en: a zona verde anexa á casa do concello, o paseo marítimo, a rúa río Sor e a de acceso ao IES Cabo Ortegal.
No caso da zona verde anexa ao Concello, retiraranse árbores con raíces invasivas para o pavimento, repoñeranse as beirarrúas existentes, e formarase unha chaira de formigón para a celebración de espectáculos ao aire libre que terá unha rampla de acceso desde a avenida da Paz.
No paseo marítimo formaranse 7 novos pasos de peóns atravesando a zona verde que separa a avenida da Paz do carril bici; 5 serán de formigón impreso e irán en paralelo a outros pasos xa existentes pero que non son accesibles, mentres que os outros 2 terán pavimento de pedra encintada e situaranse en lugares onde aínda non existe ningún itinerario peonil.
Na rúa Río Sor reordenarase a vía e dotarase de beirarrúas de 1,5 metros de ancho en ambas as marxes. Ademais, estenderase unha nova capa de rodadura de aglomerado asfáltico e repoñerase a sinalización horizontal. Por último, na vía de acceso ao IES Cabo Ortegal repararanse as fochancas e danos existentes no firme.
