Organizado pola SDR Neda coa colaboración do Concello, disputarase no campo municipal Juanito González coa participación de 32 equipos
Fin de semana de fútbol en Neda. O campo municipal Juanito González acollerá durante o sábado e domingo a XI edición do Torneo de Fútbol 8 e 11 que organiza o clube local coa colaboración do Concello. Na competición, todo un clásico xa do calendario deportivo da comarca, tomarán parte un total de 32 equipos. Unha cita coa que a SDR Neda volve a apostar polo deporte de base.
O torneo arrancará este sábado coas categorías prebenxamín, benxamín e alevín.
A partir das 9:45 horas e, dado o número de clubes inscritos, os partidos xogaranse simultáneamente en 2 campos. Sobre as 17:50 h están previstas as semifinais, e sobre as 19 h, as finais. A de benxamíns ás 19:10 h; prebenxamíns ás 19:35, e alevíns ás 20 h. A xornada concluirá ás 20,30 h coa entrega de trofeos.
Ademais, a competición retomarase o domingo cos equipos infantís. Dende as 10:30 h e ata as 15:00 h en horario de mañá e, tras unha breve parada para o xantar de media hora, retomaranse os partidos. As semifinais disputaranse a partir das 18:15 h, e a gran final, ás 19:45, coa entrega de trofeos prevista para as 20:30 h.
