• Representantes dos 52 concellos pertencentes á iniciativa reuníronse na sede central do CSIC.
• A presidenta do CSIC recoñeceu a súa implicación e compromiso para que a ciencia chegue a toda a sociedade.
O Concello de Cariño estivo presente na xornada ’10 anos de ciencia compartida’ celebrada hoxe en Madrid para conmemorar o décimo aniversario de Ciudad Ciencia, o proxecto de divulgación científica impulsado polo Consello Superior de Investigacións Científicas (CSIC) co apoio do Ministerio de Ciencia e Innovación ( MCIN)
Máis de 40 representantes dos municipios pertencentes á rede do proxecto asistiron a este encontro que tivo lugar na sede central da institución. Á xornada tamén se sumou o persoal científico e técnico do CSIC que participou ao longo desta década nas actividades organizadas nas localidades en múltiples formatos (exposicións, conferencias, talleres, catas, teatro, clubs de lectura e visitas guiadas a centros de investigación).
A presidenta do CSIC, Rosa Menéndez, trasladou aos representantes municipais o compromiso do organismo por dar continuidade a esta iniciativa, que conseguiu “un obxectivo prioritario para o Consello: facer chegar a investigación que facemos nos nosos centros á sociedade, e poñer en contacto ao noso persoal cos veciños e as veciñas dos vosos municipios”. Ademais, agradeceu a contribución dos concellos para “crear esta rede de divulgación científica na contorna local única en España”.
Na actualidade, 52 localidades de toda España forman parte de Ciudad Ciencia. Desde que se puxo en marcha en 2012, realizáronse máis de 1.000 actividades dirixidas a todas as idades, nas que participaron máis de 300 investigadores e investigadores do CSIC e ás que asistiron máis de 220.000 persoas.
Pura Fernández, Vicepresidenta Adxunta de Cultura Científica do CSIC, destacou a implicación de alcaldes e concelleiros como mediadores entre o CSIC e os seus veciños, e tamén recoñeceu o labor do persoal investigador e técnico do CSIC. “Para que a ciencia cale na sociedade debe ser contada de forma alcanzable por quen se dedica á investigación. Usamos esta fórmula durante dez anos con moi bos resultados, pois tanto a comunidade científica como os habitantes das localidades Ciudad Ciencia valoran moito esa oportunidade de dialogar e compartir dúbidas sobre a ciencia e a tecnoloxía presentes nas nosas vidas”, sinalou.
Pola súa banda, Sergio Esteve, director de Atención ao Cidadán, Transparencia e Publicacións do MCIN fixo fincapé na aposta do Ministerio por este tipo de programas que conectan directamente coa cidadanía e chegan onde outras accións de gran formato ou espazos como museos de ciencia non se atopan presentes.
O concelleiro do concello de Ubrique, Manuel Ángel Chacón, interveu en nome dos municipios da rede. Segundo o edil, “Ciudad Ciencia supuxo un salto cualitativo e cuantitativo na oferta cultural das nosas localidades. Nunca antes tiveramos de forma continuada no tempo actividades tan variadas co rigor e a calidade que nos ofrece o persoal do CSIC”.
A presentación culinaria ‘Innovación aberta: do laboratorio ao mercado’ pechou o programa desta xornada. As investigadoras do Centro de Investigacións sobre Alimentación ( CIAL) do CSIC Marta Miguel e Marta Garcés, fundadoras da empresa I Like Food Innovation, ofreceron unha charla e unha degustación dos produtos e preparacións desenvolvidas nos laboratorios do CIAL, algunhas delas en colaboración co chef Mario Sandoval.
Nova imaxe e próximas accións do proxecto
‘Porque contigo, a ciencia é outra historia’ é a mensaxe que dá forma á nova etapa de Ciudad Ciencia iniciada de maneira conxunta co Ministerio de Ciencia e Innovación. Cores intensas e rechamantes e ilustracións elaboradas por Miguel Ángel Camprubí formarán parte dunha campaña levada a cabo en redes sociais e en espazos municipais das localidades participantes.
Ademais, durante a xornada anunciáronse as próximas accións do proxecto. Unha delas será a feira científica Ciudad Ciencia, que se organizará en varios municipios da rede. Será un evento especial con programación durante unha semana dirixida a diferentes tipos de público, para que todos os habitantes poidan gozar e participar de varias actividades. Unha exposición, unha yincana, conferencias para estudantes, teatro e talleres infantís ou catas científicas para adultos formarán parte desta proposta.
Ademais, a rede continuará crecendo coa incorporación de novos municipios, como os recentemente adheridos Llíria (Valencia) e Tomelloso (Ciudad Real). As próximas incorporacións previstas serán Novelda (Alacante) e Béjar (Salamanca).
