‘A Thousand Fires’, galardoada na “Semaine de la Critique de Locarno 2021”, achégase ao día a día das familias que traballan de xeito artesán nos pozos petrolíferos do rural do país
O auditorio do centro sociocultural Ágora abre as súas portas este martes, 7 de xuño, para unha nova proxección do ciclo Documental do Mes, que chega á súa sexta sesión deste ano co punto de mira en Extremo Oriente.
‘A Thousand Fires’ (2021), un documental dirixido polo cineasta francés Saeed Taji Farouky, achégase ao día a día das familias que traballan de forma artesán na industria petroleira do rural de Myanmar, centrándose na historia de Thein Shwe y Htwe Tin. O seu fillo maior, Zin Ko Aung, busca deixar atrás un sistema ancorado no tradicional que somete á súa familia a unha explotación continua.
Farouky inspirouse na oscarizada ‘There will be blood’ (2007), dirixida por Paul Thomas Anderson e protagonizada por Daniel Day-Lewis, para achegar unha óptica diferente sobre os contrastes globais do mundo petrolífero no século XXI. Así, o documental detalla como a cultura popular de Myanmar condiciona a forma de vida dos protagonistas, marcada por cuestións como a astroloxía e os choques xeracionais.
A peza, que foi galardoada na “Semaine de la Critique de Locarno 2021”, proxectarase ás 20.00 horas en versión orixinal subtitulada ao castelán.
As entradas, xa a venda
As entradas para asistir á proxección deste martes 3 están á venda e dispoñibles a través da páxina web de Ataquilla.com e tamén no despacho de billetes central do Instituto Municipal Coruña Espectáculos (IMCE) da praza de Ourense (de luns a venres, en horario de 11.00 a 15.00, e de 16.30 a 19.30 horas, coa excepción dos festivos), cun prezo de 2,50 euros para o público xeral e de 2 euros para as e os usuarios que dispoñan de Carné Xove, sexan maiores de 65 anos ou estean en situación de desemprego. Os pases tamén poderán adquirirse mañá, o día da proxección, nos despachos de billetes do Centro Sociocultural
Ágora desde unha hora antes do inicio da sesión, sempre que haxa entradas dispoñibles.
