Todos os equipos galegos un cántabro teñen confirmada a súa presenza no torneo que organiza o Club Ciclista Carballo Vázquez y Reino
As inscricións para o Trofeo Concello de Carballo pecharán hoxe ás 23.00 horas, pero o Club Ciclista Carballo Vázquez y Reino xa ten confirmada a presenza de todos os equipos galegos para este sábado 21. Polo tanto, a canteira do ciclismo galego ao completo estará en Carballo para participar na competición, que presentaron esta mesma tarde a presidenta do Club Ciclista, Vanesa Loureiro; os concelleiros de Deporte, Marcos Trigo, e Mobilidade, Juan Seoane, e o alcalde, Evencio Ferrero.
A presentación realizouse no Centro Social Escola de Arrabaldes, onde estará instalada a oficina permanente. A presidenta do Club Ciclista Carballo destacou que, ademais dos equipos galegos, e a falta das inscricións que poidan chegar a última hora, está confirmada a presenza tamén dun equipo cántabro con cinco corredores cadetes.
A proba de cadetes, que puntúa para a Copa Galicia de estrada da Federación Galega de Ciclismo, disputarase nun circuíto de 50,9 quilómetros polos concellos de Carballo e Coristanco. Podes consultar os horarios e os lugares concretos na folla de ruta anexa.
O concelleiro de Mobilidade informou de que para facilitar o desenvolvemento da competición estará prohibido estacionar en todo o percorrido do circuíto urbano (avenida da Milagrosa e rúas Concordia, Montero Ríos, Salvador de Madariaga, Xílgaro, Emilio González López e Cemiterio Vello) dende as 14.00 ata as 21.00 horas do sábado, aproximadamente, e tamén se producirán cortes de tráfico puntuais nas estradas polas que pasará o pelotón. Policía Local e Protección Civil de Carballo e Coristanco, Garda Civil de Tráfico, persoal de Moto Volta Galicia, así como voluntarios/as do Club Ciclista Carballo Placasa velarán pola seguridade de participantes e público.
Vanesa Loureiro agradeceu a colaboración das institucións, empresas e entidades que colaboran no desenvolvemento desta gran festa do ciclismo de base. Por parte do Concello, tanto o alcalde como o concelleiro de Deporte quixeron poñer en valor o traballo que vén desenvolvendo o Club Ciclista para fomentar o ciclismo dende a infancia, un traballo que Evencio Ferrero cualificou como “exemplar”.
Na folla de ruta que acompaña esta información atoparedes horarios, percorridos e todos os detalles técnicos sobre a proba, que reunirá este sábado en Carballo a máis de 200 mozos e mozas que representan o futuro do ciclismo galego. Non vos perdades o espectáculo!
