O Concello iniciou unha campaña informativa para denunciar os problemas de seguridade viaria existentes en diversos puntos de estradas autonómicas de Oleiros, que a Xunta négase a solucionar. É o caso, entre outras, da urxente necesidade de creación de beirarrúas na avenida Isaac Díaz Pardo, do pintado de pasos de peóns na avenida República Arxentina en zonas como O Couto ou Breixo, ou da mellora e ampliación das beirarrúas entre a Igrexa de Serantes e O Cubo, en Mera.
Ante a pasividade e inacción da Consellería de Infraestruturas, procedeuse á colocación de paneis satíricos para chamar a atención dos importantes problemas existentes. Inicialmente foron instalados na zona do Couto, en Dorneda, onde o Concello reclama a creación dun paso de peóns, pero tamén se colocarán noutros puntos da rede viaria da Xunta de Galicia en Oleiros.
“A Xunta de Galicia ten que asumir as súas competencias nas estradas de Oleiros. O Concello está disposto a colaborar, como xa o fixo en moitas ocasións, pero a Consellería de Infraestruturas ten que asumir as súas obrigas e garantir a seguridade viaria a todos os cidadáns”, dixo o alcalde Ángel García Seoane.
