Enmarcadas na programación do Maio das Letras posta en marcha por parte da Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE), nesta fin de semana e comezos da próxima terán lugar varias actividades estritamente vencelladas ás Letras Galegas que homenaxean Florencio Delgado Gurriarán neste 2022.
No día 14 emprenderase a xincana infantil Na busca das letras, para a cal se recollerá o material no Cantón da Leña, das 17.30 horas en diante. Percorreranse distintas rúas e prazas da vila buscando información sobre persoeiros das letras galegas que levarán a descubri-lo código que abre o cofre máxico e contén agasallos para tódalas persoas participantes.
A Asociación de Amas de Casa ofrecerá no día 15 o festival de baile e música tradicional Agrupación Caramiñas e as Letras. Será ás 19.30 horas, no teatro cine Elma.
E o Cantón da Leña acollerá no día 16, ás 18.00 horas, a Primavera das Letras da Real Academia Galega, que consistirá no obradoiro Coloreando con Florencio e no contacontos Son o poeta que cruzou o océano, con texto de Ledicia Costa e ilustración de Blanca Millán.
A entrada para todas elas é libre ata completa-la cabida.
