O Pazo da Cultura acolleu esta mañá a celebración do acto de entrega de premios do “XXXI Certame Intercentros Concello de Narón”. A alcaldesa, Marián Ferreiro, e a concelleira de Ensino, Mercedes Taibo, acudiron xunto con outros representantes da corporación local á convocatoria, na que estiveron presentes o inspector de Educación, Santiago Sobrino, preto de 300 escolares de centros de ensino da cidade –en representación do milleiro de alumnas e alumnos que participaron- e persoal docente. O Consistorio conmemora con este acto o Día das Letras Galegas, que este o ano se adica ao escritor Florencio Delgado Gurriarán. Os CEIP Ponte de Xuvia, Piñeiros, Virxe do Mar, A Solaina, A Gándara, o CPI do Feal, o CRA de Narón e os institutos das Telleiras e Terra de Trasancos participaron nesta convocatoria.
O acto, organizado este ano polo CEIP da Solaina e presentado por alumnado da Escola de Teatro de Narón, deu comezo coa entrega de premios, por parte da alcaldesa, ao alumnado de educación Infantil e Primaria que participou nas modalidades de conto, conto ilustrado e cómic, e cuxos traballos permaneceron expostos no Pazo da Cultura. A continuación, entregáronse os premios á participación en expresión oral e canción en galego, sendo o inspector de Educación o encargado de entregalos aos gañadores e gañadoras. Houbo tamén premios á participación oral e canción en galego para, a continuación, dar comezo a actuación do Coro Solidarium do IES Terra de Trasancos, integrado por rapazas e rapaces que cursan ESO e Bacharelato no citado instituto naronés, que interpretaron o tema “Ven a min”.
Trala aplaudida actuación procedeuse á entrega dos premios e accésit ás modalidades de teatro, canción e audiovisual e o do cartel anunciador do certame deste ano, realizado por unha alumna de quinto de Primaria do CEIP A Solaina. O programa continuou cos premios de expresión escrita en educación Secundaria para, posteriormente, actuar o Peque Coro Solidarium do Concello de Narón, do que forman parte escolares de Primaria de centros de ensino da cidade, de entre 6 e 11 anos, que cantaron os temas “Durme, pequeño mar” e “Eu son un peixe”.
Despois da actuación musical a alcaldesa subiu de novo ao escenario para dar as grazas en primeiro lugar ao alumnado que participou no certame, ao inspector de Educación por acompañalos, ao centro organizador, profesorado e aos alumnos da Escola de Teatro de Narón que presentaron o acto e ao Coro Solidarium e o Peque Coro Solidarium por amenizar a convocatoria. Así mesmo, Ferreiro valorou os traballos realizados polos escolares con motivo do Día das Letras Galegas e animounos a “continuar empregando a nosa lingua con orgullo, por ser un dos sinais propios da nosa identidade”.
Ferreiro recordou tamén os actos organizados polo Concello o 17 de maio na Praza da Lectura, aos que convidou a asistir aos rapaces e rapazas e citounos para a vindeira edición do Certame Intercentros.
Finalmente, un docente do CEIP da Solaina pasou o testemuño a outra profesora do CEIP Virxe do Mar, que será o centro organizador da vindeira edición deste evento, tal e como se anunciou no acto.
