A Xunta de Goberno Local aprobou o expediente de contratación dos traballos de reforma de catro parques urbanos e cinco rotondas
En maio de 2019, o Concello de Carballo iniciou a reforma integral de 11 espazos axardinados: Rego da Balsa, prazas de Galicia, do Concello e da Cruz Vermella e sete rotondas. Este primeiro contrato permitiu estender ás zonas verdes o proceso de transformación que está a experimentar a nosa vila.
Despois desa primeira intervención, cuxos resultados están á vista, o goberno municipal dá un paso adiante cun novo proxecto de mellora integral doutros 8 espazos axardinados: os parques do Anllóns, Eduardo Pondal, A Milagrosa e San Cristovo, a rotonda de Pedra Furada e outras catro situadas no polígono de Bértoa. O investimento, aprobado hoxe pola Xunta de Goberno Local, acada os 89.999,71 euros.
As actuacións teñen un obxectivo ornamental pero tamén funcional, con deseños adaptados a cada espazo. Así, por exemplo, na zona da Milagrosa crearanse pantallas acústicas e de protección, nas rotondas primará o acolchado de solos espidos e no Parque do Anllóns xeraranse novas zonas de sombra. Todas as melloras realizaranse en función de criterios técnicos, tratando de evitar ou paliar os problemas de tipo fitopatolóxico, biomecánico, fisiopático e de funcionalidade que presentan agora mesmo algunhas desas zonas verdes.
Pero ademais de realizar unha clara aposta de xardíns máis sostibles, coas especies axeitadas a cada espazo, sistemas de rego e un alto estándar de calidade, o Concello de Carballo reforza o seu compromiso coa integración social, xa que o contrato estará reservado a centros especiais de emprego de iniciativa social e empresas de inserción reguladas.
Outros acordos
A Xunta de Goberno Local tamén adoptou hoxe outros acordos:
• Pago de facturas por importe de 20.112,28 euros.
• Aprobación definitiva do proxecto de expropiación polo procedemento de taxación conxunta para a obtención de terreos de propietarios non incorporados á xunta de compensación do sector SI-4 Calvo. Serán expropiadas 4 parcelas, cunha superficie total de 312,02 metros cadrados, e un prezo total de 1.983,74 euros.
• Licenzas de obra, entre elas a relativa a construción dun edificio con 11 vivendas, 17 prazas de garaxe e 11 rochos na Praza de Galicia.
• Contrato privado para o alleamento da participación indivisa da parcela M1 de cesión de aproveitamento urbanístico no ámbito SUD-D/S-T3- A Revolta, no que o Concello de Carballo é propietario dunha parcela de 2.806,33 metros cadrados pola que percibirá 232.055,42 euros.
