O goberno comprometeuse a facer as reparacións no paseo fluvial solicitadas polo BNG.
Arteixo, 29 de abril de 2022.- O pleno de Arteixo de abril aprobou por unanimidade as mocións presentadas polo BNG. Tanto a moción para que Arteixo se converta na sede da Axencia Estatal de Supervisión de Intelixencia Artificial como a de apoio ao pobo saharauí foron referendadas por todos os grupos políticos.
Na primeira das mocións, o BNG defendeu a idoneidade de Arteixo para converterse en sede deste Axencia dado o seu gran tecido industrial innovador, a dispoñibilidade de espazo e a proximidade da Facultade de Informática, onde se impartirá o grao e mestrado en Intelixencia Artificial. Os nacionalistas consideran que “Arteixo ten un ecosistema ideal para ser foco desta tecnoloxía que será determinante na sociedade dixital na que xa estamos”. Ademais, Galiza é pioneira no Estado en ter unha estratexia propia de IA (EGIA 2021-2030) e dispón dun Centro de Investigación en Tecnoloxías Intelixentes.
Na segunda e, en consonancia coa moción institucional de apoio ao pobo ucraíno do mes pasado, exprésase o apoio do concello de Arteixo ao pobo saharauí e a condena da agresión marroquí.
Rogos e preguntas
O BNG preguntou se o Goberno sabe cantas persoas refuxiadas ucraínas chegaron ao municipio e se ten prevista algunha axuda para elas. O goberno indicou que hai varias familias acollidas por particulares en Morás, Meicende e Oseiro, ademais dalgúns clubs deportivos. Explicou tamén que as axudas serán personalizadas cando os traballadores sociais se reúnan con elas.
Os nacionalistas tamén volveron demandaron a documentación sobre a restauración e situación da canteira de Vilarrodís pedida xa en marzo. O goberno dixo que tivera problemas pero xa foi enviada tralo pleno.
O BNG solicitou que, na maior brevidade posible, o Concello arranxe o mal estado do mobiliario do paseo fluvial e o goberno recoñeceu certo deterioro e contestou que van actuar para facer as reparacións correspondentes.
Finalmente, desde o BNG pediuse a eliminación da cita previa no Concello de Arteixo para trámites administrativos, en tanto os prazos actuais limitan as xestións dos usuarios. Porén, desde o goberno teñen intención de manter a cita previa, aínda que adoptarán unha solución mixta a partir do día 5 de maio. Así, de 9 a 11 horas atenderase sen cita previa e de 11.30 a 14 horas será con cita previa.
