A actividade desenvolverase durante todo o sábado 30 de abril no PALEXCO e estará aberta a toda a cidadanía que queira participar
A Asociación Galega do Profesorado de Matemáticas (AGAPEMA) celebrará este ano, de novo, a súa Feira matemática, despois de dous anos de suspensión pola pandemia. Na súa XV edición, a Feira Matemática retoma a súa actividade con numerosos centros educativos e entidades oficiais grazas á colaboración do Concello da Coruña, que mantén con AGAPEMA un convenio para a promoción e difusión das matemáticas no eido escolar.
A organización da XV Feira Matemática ten como orixe a conmemoración do Día escolar das matemáticas (12 de maio), unha data celebrada en España dende o ano 2000 e que promove o coñecemento e traballo da disciplina no eido escolar. Deste xeito, a Feira Matemática procura ser un espazo onde os máis pequenos gocen da aprendizaxe matemática dun xeito lúdico, compartindo actividades e xogos coa disciplina como eixe principal. Para iso, cada centro disporá dun stand no que propón diferentes actividades que deben resolver os e as asistentes. Unha vez feito, os encargados do posto darán uns “agapemos” —moedas de cambio da Feira—,que poderán trocarse ao final da feira por algún dos agasallos ofertados polas entidades colaboradoras. Á actividade sumáronse un total de 18 entidades e centros escolares, que estarán de forma presencial no PALEXCO cos seus postos.
Ademais das actividades dos postos escolares, a Feira Matemática contará con tres concursos para os asistentes: Fotografía Matemática, Matmonólogos e Esopías. Estas actividades teñen como obxectivo mostrar que as matemáticas non son algo estanco e pechado, senón que son un tema transversal que chega a diferentes disciplinas. Están previstas, ademais, algunhas actividades e xogos, como a busca do tesouro, obradoiros de papiroflexia ou maxia matemática. As actividades desenvolveranse durante todo o día, desde as 10.30 ata as 20.00 h, e están abertas a todas aquelas persoas que desexen asistir —aínda que orientadas ao público familiar pola súa perspectiva lúdica e escolar—. Máis información en https://www.agapema.org/feiramatematica.
