— A directora xeral de Administración Local, Natalia Prieto, visitou os proxectos levados a cabo con apoio da Xunta neste municipio, ao que nos últimos anos destinou máis de 1,7M€ para iniciativas coas que mellorar a calidade de vida local
— A Xunta achegou o ano pasado case 28.000 euros ao acondicionamento das dependencias da Casa Consistorial cunha axuda da Orde de Infraestruturas de uso público
— Tamén se destinaron preto de 35.000 euros á adquisición dun vehículo destinado a labores de protección do ambiente e do espazo natural, ao abeiro do Fondo de Compensación Ambiental
A directora xeral de Administración Local, Natalia Prieto, acompañada do delegado territorial da Xunta na Coruña, Gonzalo Trenor, visitou esta mañá o concello de Curtis, ao que o Goberno galego leva destinados nos últimos anos máis de 1,7 millóns de euros en apoio a melloras ambientais e nas súas infraestruturas que redundaron no benestar da veciñanza.
No que se refire ás axudas concedidas o ano pasado, o municipio recibiu por parte da Xunta case 28.000 euros para as obras de mantemento na Casa Consistorial ao abeiro da Orde de infraestruturas de uso público. A través destas axudas, a Administración autonómica apoia ás entidades locais galegas na creación ou mellora das súas instalacións destinadas á prestación de servizos municipais como parques infantís, dependencias municipais ou recintos deportivos, así como a renovación do alumeado público ou a pavimentación de camiños.
As melloras levadas a cabo Casa do Concello de Curtis incluíron traballos de mantemento nas carpinteiras de madeira en todas as plantas e a reparación de revestimentos nalgúns despachos. Tamén se acondicionaron varios espazos e se mellorou a accesibilidade co obxectivo de ofrecer unha maior seguridade de traballadores e cidadáns durante a pandemia da covid-19. Trátase dunha das 125 iniciativas financiadas o ano pasado na comunidade no marco desta orde de axudas, á que a Xunta destinou neste 2022 un orzamento de 3,5 millóns de euros.
Por outra parte, a Xunta investiu o ano pasado preto de 35.000 euros para colaborar co municipio na adquisición dun vehículo para labores de protección do ambiente e do espazo natural a través do Fondo de Compensación Ambiental (FCA). En concreto, en actuacións de conservación e mantemento e espazos verdes e sendas peonís no río Mendo, Carregal e Mandeo, así como na recollida selectiva de residuos. O novo vehículo vai destinado ao servizo de Protección Civil do concello e ao Grupo de Emerxencias Supramunicipal Betanzos-Terra de Melide-Ordes con sede neste municipio e que tamén cubre Aranga, Mesía, Oza-Cesuras, Sobrado e Vilasantar. Ademais, a Xunta financia máis da metade do custo anual do funcionamento deste grupo, ao igual que os demais de GES da comunidade.
O Goberno galego financiou o ano pasado 248 proxectos das dúas liñas do FCA contribuíndo a favorecer o desenvolvemento sostible das entidades locais con medidas para evitar a degradación ambiental como a contratación de persoal e a dotación de maquinaria e vehículos para tarefas ambientais como o adquirido en Curtis, así como melloras nos servizos de abastecemento, saneamento e recollida de lixo. Tamén destacan como medidas subvencionables deste fondo as actuacións de eficiencia enerxética e o uso de enerxías renovables no alumeado público e nas instalacións municipais, xunto coa adquisición de vehículos con distintivo ambiental Cero emisións ou Eco.
Nesta liña, nos últimos anos o municipio de Curtis ten recibido do FCA achegas da Xunta para o acondicionamento e a rexeneración de espazos naturais ou actuacións de eficiencia enerxética no alumeado público. O Goberno galego apoiou ademais varios proxectos ambientais conxuntos cos concellos de Sobrado e Vilasantar, como o financiado o ano pasado con 15.000 euros destinados á contratación de persoal técnico para a supervisión do servizo de recollida e xestión de residuos sólidos urbanos nos tres municipios.
