• A procesión sairá ás 23 horas da igrexa das Orfas e levará a cabo un acto especial na praza das Praterías ás 24 horas
• Diversas autoridades eclesiásticas, civís e representantes das demais confrarías da cidade, acompañarán aos estudantes esta noite polo seu aniversario
Esta noite do Mércores Santo, a Irmandade dos Estudantes tomará as rúas compostelás cos seus capuces negros. Nun ano especial, posto que celebran o seu 25 aniversario, esta irmandade, unha das máis novas da cidade; estará acompañada por diversas autoridades eclesiásticas e civís así como de representantes doutras confrarías da cidade.
Con saída ás 23 horas da súa sede, a igrexa das Orfas, a procesión se dirixirá cara a Praza das Praterías, lugar no que levarán a cabo un acto especial de reverencia ao Apóstolo. Ademais, durante o día de hoxe e, desde ás 10.30 ata as 21 horas, a igrexa terá as portas abertas para exhibir as imaxes e enseres da irmandade.
A procesión comezará, tal e como é tradición, con tres golpes de martelo na porta da súa sede e estará encabezada pola Cruz de Guía e os nenos vestidos de gala. Acompañada musicalmente da Banda da Nosa Señora da Misericordia de Viveiro, na procesión participará o Santísimo Cristo da Misericordia e Noso Pai Xesús da Esperanza. A maiores, no ano 2019, a irmandade incorporara á súa Estación de Penitencia á Nosa Señora da Milagrosa, unha talla portada por nenos e nenas cunha gran devoción no colexio das Fillas da Caridade, ao ser a imaxe que as relixiosas teñen na súa capela de oracións pero, lamentablemente ese ano, os estudantes non puideron saír ás rúas por mor da choiva.
—
Percorrido da Procesión dos Estudantes
Rúa das Orfas – Cantón do Toural – Praza do Toural – Rúa do Vilar – Praza das Praterías – Rúa da Conga – Rúa de Xelmírez – Rúa Nova – Cantón do Toural – Rúa das Orfas.
