– O percorrido para coñecer os traballos de posta en valor das estruturas será mañá sábado ás 12,00 horas e para asistir cómpre reservar no teléfono 981 787 508
– Na fase de escavación localizáronse numerosos restos como unha lápida romana ou un muro na fachada occidental que permiten ampliar o coñecemento sobre este forte
A Xunta de Galicia amosará os avances da última intervención impulsada no xacemento romano da Ciadella nunha visita guiada que terá lugar mañá, sábado, ás 12,00 horas a cargo da empresa responsable dos traballos. Trátase dun percorrido para coñecer a posta en valor das estruturas arqueolóxicas dos Principia e da Via Principalis do forte e para asistir cómpre reservar a través do teléfono 981 787 508.
Nesta actuación a Consellería de Cultura, Educación e Universidade achega 200.000€ no marco do programa Feder Galicia 2014-2020 e eleva o investimento do Goberno galego neste ben a preto de 600.000 nos últimos seis anos. En concreto, a intervención iniciouse a finais do pasado ano coa escavación do xacemento para, unha vez rematada esta fase no mes de febreiro, comezar os traballos de consolidación e restauración das estruturas arqueolóxicas coa finalidade de favorecer a súa conservación e protección e tamén para facilitar a súa comprensión aos visitantes que se acerquen ao xacemento.
Está previsto que o proxecto remate en verán co acondicionamento e limpeza do xacemento para, finalmente, sinalizar o espazo mediante cartelería e fitos informativos para que os visitantes poidan realizar unha visita auto guiada.
Actuación no Principia e Via Principalis
Así, nesta ocasión o obxectivo é realizar unha intervención integral de posta en valor dunha serie de espazos e estruturas arqueolóxicas situadas no sector central do campamento romano de Ciadella no que, en boa parte del, xa se desenvolveron diversas actuacións arqueolóxicas. Para iso, no transcurso dos traballos estase a actuar sobre os denominados Principia, unha edificación duns 1000 metros cadrados que funcionaba como cuartel xeral e espazo medular do forte romano, e a Via Principalis, arteria viaria principal no interior do campamento romano.
As escavacións levadas a cabo durante a primeira fase da actuación permitiron localizar numerosos restos e obter máis información do forte militar. En concreto, foron descubertos os muros delimitadores de varias edificacións na Via Principalis e unha lápida funeraria romana que se conserva en perfecto estado e na que se pode ler o texto da dedicatoria que fai unha nai ao seu fillo morto aos 9 anos, 6 meses e 9 días.
Por outro lado, a intervención tamén serviu para definir con maior claridade os diferentes sectores nos que se divide o cuartel xeral e localizar un muro na fachada occidental do edificio que permite comprender mellor toda a estrutura.
Estes descubrimentos súmanse aos feitos nas últimas campañas realizadas pola Administración autonómica na Ciadella nas que saíron á luz importantes restos e pezas de cerámica destacando a identificación dun gran horreum de planta rectangular destinado a gardar os alimentos das tropas ou a documentación dun pórtico monumental no edificio principal que supón un exemplo único do Imperio Romano neste tipo de construcións.
