O rexedor popular alega falta de espazos, e o PSdeG afirma que a decisión obedece a un capricho persoal
O Alcalde de O Pino, Manuel Taboada, non quere a sede do GDR Ulla Tambre Mandeo. A súa intención, que se traslade a outro concello, e que abandone as actuais instalacións situadas no antigo Centro Médico de Arca.
Estas oficinas que levan máis dunha década asentadas no Pino están destinadas a prestar servizos e asesorar aos distintos axentes públicos e privados que así o solicitan. Un dos seus principais obxectivos é a captación de axudas financiadas con fondos europeos. Fondos destinados ao desenvolvemento rural en base ás liñas e estratexias do programa Leader. Unha xestión que, nos últimos dez anos, conseguiu prestar apoio económico a numerosas iniciativas públicas e privadas repartidas polos nove concellos que forman o GDR, incluído o Concello de O Pino.
Manuel Taboada, actual rexedor do Pino e presidente do GDR, pretende agora trasladar estas oficinas, alegando que carece de espazos dispoñibles para estas oficinas, e así o confirmou nunha das últimas sesión plenarias. Afirmación que o PSdeG local cualifica como falsa, indican que sobran espazos municipais para manter a sede do GDR no termo municipal, “a intención do alcalde obedece unicamente a un capricho persoal que debe explicar” afirman os Socialistas.
Informan que hai espazos municipais sen ningún uso no Pedrouzo-Arca para manter a sede do GDR, “entre outros moitos temos: o antigo PAI, a antiga Cámara Agraria, ou incluso a planta superior da Casa do Concello, toda unha planta que leva anos pechada a cal e canto” segundo explican.
O Grupo Municipal Socialista non acepta como válidas as escusas do Alcalde e no Pleno deste mércores, 30 de marzo, a concelleira do grupo socialista Inka Lareo defenderá unha moción solicitando que a Sede do Grupo de Desenvolvemento Rural Ulla Tambre Mandeo se manteña no Concello do Pino.
Así mesmo, tamén informan que Taboada é o único membro/asociado do GDR que quere mudar a sede do Grupo de Desenvolvemento.
