Os traballos, financiados grazas á captación dos fondos Next Generation, executaranse nun prazo de doce meses. Ademais, o proxecto abrangue melloras de adaptación nas paradas da rede de autobuses
O Concello acometerá a construción dun novo tramo de carril bici na Coruña, ampliando a rede xa existente con outros 1,2 quilómetros de percorrido na contorna de Riazor e a Cidade Xardín, un plan de mellora na mobilidade pola cidade que se acometerá grazas á captación de 11 millóns en fondos Next Generation por parte do Goberno de Inés Rey.
Este novo percorrido para vehículos non motorizados, que sairá a licitación por máis de 550.000 euros e terá un prazo de execución de doce meses a partir da súa adxudicación, decorrerá 800 metros pola avenida da Habana, no lateral superior do estadio municipal de Riazor, e un último tramo que cruzará a avenida de Bos Aires para darlle continuidade ao carril bici polo paseo marítimo.
Ademais, levarase a cabo a construción de outros 300 metros de carril bici na rúa Gregorio Hernández, uníndose co tramo xa disposto tras a reurbanización da rolda de Nelle, coa retirada do viaduto.
Este tramo de carril bici de 1,2 quilómetros terá 2,5 metros de ancho e será de dobre dirección, e contribuirá tamén á renovación e mellora da contorna de Riazor, o paseo das Pontes – Cidade Xardín e San Roque. Neste sentido, durante os traballos, plantarase tamén arboredo e levaranse a cabo melloras de adaptación nas paradas da rede de autobuses.
Un novo impulso para adaptar a cidade á mobilidade sostible
Coa captación dos 11 millóns en fondos europeos, o Concello sufragará tamén o novo trazado de carril bici en Fernández Latorre, así como as melloras nos tramos xa existentes na cidade para reforzar a súa seguridade. A isto súmase, por outra banda, as melloras previstas polos proxectos aprobados nos Orzamentos Participativos do ano pasado, que abranguen novos tramos na avenida de Arteixo e cara ao barrio de Novo Mesoiro, así como as obras xa adxudicadas para conectar o carril bici da rúa Pablo Picasso coa avenida de Salvador de Madariaga. Ampliarase, ademais, a dispoñibilidade de bicicletas eléctricas no servizo de Bici Coruña.
Todas as actuacións previstas licitaranse no primeiro semestre de ano, co fin de que estean rematadas como moi tarde en decembro do ano 2023.
