É a primeira pista do municipio no que se emprega este tratamento de selado e mellora do firme
O Concello de Frades vén de iniciar as obras de acondicionamento da estrada de Moar a Galegos, un camiño de 3.400 metros e 5 metros de ancho no que investirá 57.359,05 euros. Uns cartos procedentes dun convenio de colaboración asinado entre o Concello de Frades e a Deputación da Coruña, que achegará o 80% do investimento (45.887 euros) mentres que a entidade municipal achegará os restantes 11.471 euros.
As obras consisten na limpeza das cunetas ao longo dos 3,4 quilómetros do camiño que comunica as parroquias de Moar e Galegos, onde se farán actuacións de bacheo e tratamento semiprofundo bituminoso. Unha estrada que na actualidade ten un firme bastante deteriorado polas inclemencias meteorolóxicas e o desgaste propio do importante tráfico de vehículos que rexistra.
Como novidade, aplicarase un firme de microaglomerado para o selado da estrada. Será a primeira estrada de Frades na que se utiliza este tratamento, moito máis económico que outros tratamentos convencionais e que permite conseguir unha calzada antideslizante e impermeable. Deste xeito, o microaglomerado evitará que a auga poida chegar ás capas inferiores do firme, atrasando o deterioro da calzada e a aparición de fochancas. Ademais, trátase dun tratamento que se aplica con maior rapidez, polo que dende o Concello de Frades esperan que as obras estean rematadas antes de que remate o mes de abril.
