― Estas actuacións no territorio do distrito forestal V Fisterra consistiron en limpezas de restos, rozas, podas ou clareos en zonas declaradas de alto risco de rexistrar lumes
― Enmárcanse no Plan de prevención de incendios forestais da Consellería do Medio Rural, que contou cun orzamento de case 30 millóns de euros no ano 2021 para actuar en máis de 58.000 hectáreas nuns 5.000 quilómetros de pistas e vías de comunicación
A Consellería do Medio Rural vén de realizar diversas obras preventivas no distrito forestal V Fisterra, cun orzamento superior aos 107.000 euros. As actuacións concentráronse nos concellos de Mazaricos, Muros e Carnota.
Así, en Mazaricos e Muros levouse a cabo roza mecanizada de faixas auxiliares, roza manual, poda, clareo en masas arbóreas de distintas densidades, así como a recollida e posterior eliminación de restos forestais, para avanzar na anticipación aos incendios forestais. Estes traballos realizáronse nos montes de Aro de Serráns, Ruña de Colúns e Cotro e Canle de Penedo, no municipio de Mazaricos, mentres en Muros se actuou nos montes de Pedregal, Bolantón e Tal. Cun investimento total de 29.115 euros, cómpre sinalar que todas as accións se localizaron en zonas de alto risco de incendio (ZAR).
Tamén se concentraron en zonas de alto risco de rexistrar lumes os labores executados na localidade de Carnota, por un importe global de 78.792 euros. Rexistráronse, concretamente, nas parroquias de San Mamede, Santa Comba de Carnota e Monte Pindo, neste último caso, nun espazo natural protexido. As obras consistiron en roza mecanizada en faixas auxiliares en ambas marxes e ao longo das vías de comunicación en áreas forestais, roza manual, podas e clareo de masas arboradas e posterior recollida e eliminación dos residuos forestais resultantes.
Todas estas obras enmárcanse no Plan de prevención de incendios forestais da Consellería do Medio Rural, que no ano 2021 contou cun orzamento de case 30 millóns de euros para actuar en máis de 58.000 hectáreas de territorio e nuns 5.000 quilómetros de pistas e vías de comunicación. O obxectivo final destas accións preventivas é evitar que o lume se produza, e en caso de producirse, limitar ao máximo a súa propagación e minimizar os danos causados.
