A obra, que comezará ás 20.30 horas, supón o debut teatral de Navarro. A función combina xéneros como a copla, o jazz e a canción popular española para conectar co público
O Teatro Colón abrirá as súas portas este venres, 18 de febreiro, para a estrea do espectáculo ‘En tierra extraña’, unha obra escrita e dirixida por Juan Carlos Rubio que, ademais, supón o debut teatral da cantante malagueña Diana Navarro, protagonista da peza.
‘En tierra extraña’ narra un encontro ficticio entre as figuras de Concha Piquer e Federico García Lorca. Piquer, interpretada por Diana Navarro, amosa o seu desexo de coñecer a García Lorca, encarnado polo actor Alejandro Vera, coa idea de propoñerlle que o poeta lle escriba unha canción. Para iso, Piquer pide axuda ao seu colaborador Rafael de León (Avelino Piedad) para citarse no Teatro Español de Madrid. Porén, a verdadeira motivación de Piquer para organizar este cara a cara é, en realidade, avisar a García Lorca da situación irreversible do país, na antesala da Guerra Civil, e advertirlle de que o seu nome figura en varias listas negras, polo que lle recomenda fuxir.
A música é fundamental no desenvolvemento do espectáculo, e mestura a copla, o jazz, as cancións de Broadway, a música cubana e tamén a canción popular española para achegarse ao público. Desde a súa estrea, o pasado mes de novembro, ‘En tierra extraña’ colleitou o aprezo da crítica e asistentes, que coincidiron en destacar a calidade do espectáculo e os seus protagonistas, con cheos absolutos en todas as representacións levadas ata o momento en España.
As entradas para asistir ao espectáculo, con prezos que van desde os 15 ata os 20 euros, están á venda a través da páxina web de Ataquilla.com e no despacho de billetes central do Instituto Municipal Coruña Espectáculos (IMCE) da praza de Ourense (de 11.00 a 15.00, e de 16.30 a 19.30 horas). Os pases tamén poderán adquirirse o día da actuación, no despacho de billetes do Teatro Colón, desde dúas horas antes do comezo da función, sempre que haxa entradas dispoñibles.
Tras Diana Navarro, o Colón acolle esta fin de semana o concerto de Ismael Serrano Xa durante a fin de semana, concretamente o sábado 19 de febreiro (20.30 horas), o Teatro Colón acollerá tamén o concerto do cantautor madrileño Ismael Serrano, que presenta na Coruña o seu novo traballo, ‘Seremos’, o agardado álbum inédito co que se posicionou durante as primeiras semanas no número dous da lista de vendas.
Ademais, o domingo 20 (12.30 horas), o Teatro Colón ofrece a estrea dun recital de violonchelo e piano interpretado por Carolina Landriscini e Andrés Hernández, que presentan o disco musical ‘El violonchelo en tiempos de Gaos’. Trátase dun proxecto que aborda algunhas das obras para violonchelo e piano escritas nas dúas primeiras décadas do século XX tomando como punto de partida as contribucións do compositor coruñés Andrés Gaos Berea, e acompañándoas con obras escritas por outros compositores ao longo dos primeiros vinte anos de dito século.
