O departamento de Cultura programou unha maratón de lectura dos seus poemas na que se intercalará a actuación do grupo de Cantos de Taberna
Achégase a celebración do aniversario do nacemento de Rosalía Castro (quitámoslle o “de” porque ela asinaba sen el), nai do Rexurdimento e avanzada ao seu tempo pola mensaxe de empoderamento feminino e social que zumega a súa obra. Ata hai pouco críase que a escritora de Iria Flavia viñera ao mundo un 24 de febreiro, pero un estudo da investigadora Sagrario Abelleira dado a coñecer hai escasos meses evidenciou que a data real foi o 23 de febreiro de 1837. Un cambio na data oficial aceptado pola fundación que leva o seu nome que, porén, non altera a maneira de celebrar a súa figura, que en San Sadurniño se fará dedicándolle toda unha mañá á súa poesía.
O aniversario do nacemento de Rosalía celebrarase cunha exposición na galería da Casa do
Concello, que poderá visitarse até finais de mes. Porén, o día 23 de febreiro o patio interior da casa consistorial acollerá unha lectura libre de poemas que ela nos deixou como legado cultural e símbolo do Rexurdimento da nosa lingua na literatura.
A Concellaría de Cultura convida a participar a toda a veciñanza, ás entidades e ao alumnado e profesorado do CPI, a quen xa se lle remitiu o convite oficial para o evento.
Quen queira pasar por alí e ler unha das poesías rosalianas só terá que chamar ao 616 332 919 para que lle confirmen o horario aproximado dunha cita que se desenvolverá entre as 11 e as 13:00h. Ademais, a iso das 12:00h tamén está prevista unha interpretación do poema “No bico un cantar” a cargo do grupo de Cantos de Taberna.
Máis maneiras de homenaxear a Rosalía
Canda esta cita prevista polo Concello, a Fundación Rosalía de Castro tamén fai o seu propio chamamento á participación nas homenaxes á escritora despois de que o pasado outubro trascendese o resultado dunha nova investigación sobre a súa vida.
O dato máis destacado foi a confirmación de que, efectivamente, Rosalía naceu o 23 de febreiro de 1837, tal e como constatou Sagrario Abelleira tras atopar no Arquivo Diocesano de Madrid o expediente do seu matrimonio con Manuel Murguía.
Na documentación tamén se reflicte que ambas figuras do Rexurdimento se comprometeran un ano antes de casar e entre os papeis aparece unha declaración notarial asinada por Teresa de Castro en xuño de 1843 manifestando explicitamente ser a nai da escritora, o que viría confirmar “que é unha nai solteira que non abandona a sua filla nunca, que existe un vínculo entre nai e filla que resiste o paso do tempo”, segundo lle declarou o presidente da fundación, Anxo Angueira, ao xornal Nós Diario.
Esta descuberta ofrece unha nova visión sobre a biografía da autora nada en Conxo e criada entre Ortoño e Padrón, pero non muda a interpretación da súa envergadura literaria e como figura clave do rexurdimento da nosa lingua, así como tampouco o innegable contido feminista e de denuncia social de boa parte da súa obra.
A Fundación Rosalía de Castro volve insistir este ano en que se aproveite para ler a súa obra e propón de novo accións individuais que se multipliquen a través das redes sociais, entre elas facer o Caldo de Gloria, unirse á Alborada para Rosalía ou participar nos actos centrais organizados para o 23 de febreiro.
