O Plan Complementario dedicarase á mellora dos accesos ás localidades de Babenzo (Bastavales) e Gosende (Os Ánxeles)
O Pleno de Brión, reunido en sesión extraordinaria, aprobou por unanimidade e sen debate a proposta da Alcaldía para o Plan Único de Concellos POS+2022 da Deputación da Coruña, que ascende a 426.102,08 euros. Desta cantidade, os 202.293,97 euros da Achega 2022 será destinado a gasto corrente mentres co resto será investido en obras de reforzo do firme de varias estradas municipais.
O Concello de Brión achegará 15.390 euros á Achega 2021 da Deputación (137.833,18 euros) para acometer un proxecto de reforzo do firme nos accesos a Guitiande e no viario da contorna da Urbanización do Balneario do Tremo, ambas actuacións na parroquia dos Ánxeles e dende a AC-543 Santiago-Noia. Así mesmo, reforzarase o firme dos viarios da aldea de Vioxo de Arriba, na parroquia da Luaña. En total, as tres melloras suman 8.700 metros cadrados. Así mesmo, o Pleno aprobou un Plan Complementario de 404.497,22 euros que contempla a mellora do viario de acceso a Babenzo (Bastavales) e a mellora do acceso a Gosende (Os Ánxeles).
O Pleno tamén aprobou por unanimidade o POS+Adicional para Gastos Sociais, que ascende a 70.802,88 euros. Unha achega que será investida na ampliación das axudas á emerxencia social, ampliación do persoal de Servizos Sociais e reforzo das axudas ao respiro familiar e conciliación. Finalmente, o Pleno ratificou a adhesión do Concello de Brión ao convenio entre a Xunta, a Fegamp e as Deputacións de A Coruña e Lugo para atención de emerxencias, prevención e defensa contra os lumes forestais e desenvolvemento dos Grupos de Emerxencias Supramunicipais. O acordo é por un ano, entrando en vigor o 1 de xaneiro de 2022.
