O Concello de Abegondo impulsa un programa de actividades para maiores baseado na estimulación cognitiva, o termalismo, as novas tecnoloxías e as actividades ao aire libre.
Así, os talleres de memoria estarán dispoñibles en Abegondo, os martes de 10:30 a 12:00 horas e en Viós, de 10:00 a 11:30 horas. Na área de novas tecnoloxías e audiovisuais, estará dispoñible unha actividade para “uso do móbil” no que se pretende resolver dúbidas sobre o uso dos smartphones. Será os mércores de 11:00 a 12:00 horas e ata o mes de xuño.
A partir de febreiro, continuarán as actividades de sendeirismo consistentes na realización de roteiros pola contorna de Abegondo, co obxectivo de camiñar, xa que é un bo exercicio cardiovascular, pero tamén de coñecer o territorio.
Co servizo de orientación e apoio ao maior, preténdese evitar o illamento social dos maiores, incidindo nas persoas que viven soas ou que teñen dificultades para acceder aos distintos recursos, a través de visitas domiciliarias e chamadas telefónicas dos técnicos de Servizos Sociais.
Por último, por medio do programa de termalismo do IMSERSO, as persoas que así o desexen e maiores de 65 anos, poderán visitar distintos balnearios contemplados no mesmo. Para a quenda de febreiro a agosto, pode realizarse a inscrición ata o 14 de maio de 2022. Para a quenda de setembro a decembro, será posible formalizala ata o 30 de outubro de 2022.
Ante calquera dúbida, as persoas interesadas poden chamar ao 981 64 79 96 ou achegarse ao departamento de Servizos Sociais do Concello de Abegondo, ambos os casos tamén efectivos para realizar as inscricións.
