Precisa que 142 millóns destinaranse ao impulso da I+D+i e do desenvolvemento tecnolóxico, co principal obxectivo de incrementar en seis puntos o gasto das empresas en innovación, pasando do 46% ao 53%
O presidente da Xunta, Alberto Núñez Feijóo, salientou que Galicia destinará a gran maioría dos 883 millóns dos Fondos Feder para afrontar os retos dun novo modelo económico cara a un crecemento intelixente, con máis innovación; un crecemento sostible, con máis respecto ao medio ambiente e ao valor dos recursos naturais; e un crecemento integrador, que garanta as mesmas oportunidades educativas, sanitarias e sociais a todos os cidadáns.
Durante a presentación do Programa operativo Feder Galicia 2014-2020, Feijóo lembrou que a Comunidade galega non é a mesma que cando entrou na Unión Europea. “E se hai unhas décadas o noso principal reto era superar o illamento de España e de Europa; hoxe, temos outras necesidades, outros obxectivos e outras posibilidades e o noso gran desafío é mellorar a nosa competitividade”, abondou.
Nesta liña, incidiu en que a este obxectivo irán destinados a maioría dos fondos Feder; “practicamente, sete de cada dez euros se repartirán entre os catro eixos que sosteñen a nosa aposta económica, na que vimos traballando dentro do noso Plan Estratéxico e que concentran tamén a Estratexia de Especialización Intelixente 2014-2020”, aseverou.
Máis polo miúdo precisou que 142 millóns de euros destinaranse ao impulso da I+D+i e ao desenvolvemento tecnolóxico, co principal obxectivo de incrementar en seis puntos o gasto das empresas en innovación, pasando do 46% ao 53%. E, arredor de 140 millóns terán como obxectivo potenciar e mellorar a calidade das tecnoloxías da comunicación, completando o proceso de modernización da Administración e dos servizos públicos e o coñecemento dixital dos galegos.
Para mellorar a competitividade das pequenas e medianas empresas destinaranse 143 millóns, contribuíndo sobre todo a aumentar o tamaño das que xa existen, pero tamén a crear outras novas; e outros 153 millóns terán como obxectivo insistir na consolidación dunha economía respectuosa co medio ambiente, cunha aposta aínda maior polo uso das renovables, polo fomento da mobilidade sostible, ou pola redución de emisións de gases efecto invernadoiro en oito puntos.
Durante a súa intervención, Feijóo subliñou tamén que o investimento restante -un pouco máis do 30%- terá como destino completar algunhas das tarefas iniciadas no período anterior como é o saneamento das rías e o fomento do sector turístico.
O titular do Goberno galego aseverou que a concentración temática é unha das dúas principais fortalezas do programa presentado hoxe: “Temos claras prioridades e fixamos métodos e instrumentos para conseguilos. Este programa non é improvisado senón que responde ás necesidades do presente e márcase retos de futuro para facilitar o camiño, en lugar de comprometer, ás próximas xeracións”, explicou.
Galicia, unha das primeiras comunidades en ter aprobado este programa
Durante a súa intervención, destacou, tamén, que Galicia é unha das primeiras comunidades en ter aprobado este programa: “Grazas a o esforzo conxunto de toda a Administración galega, así como doutros organismos e entidades económicas e sociais que participaron na súa elaboración. E, grazas a unha convicción tamén compartida por todos os que, dunha ou outra forma, participamos na elaboración deste programa. Refírome á idea de que os fondos contribúan a unha aposta que fixemos como país, baseada nun novo modelo económico”.
Nun acto no que tamén participaron a directora de Crecemento Intelixente e Sostible e Sur de Europa da Dirección Xeral de Política Rexional e Urbana da Comisión Europea, Charlina Vitcheva, e a secretaria de Estado de Presupostos e Gastos do Ministerio de Facenda e Administracións Públicas, Marta Fenández Currás, Feijóo afirmou que Galicia renova hoxe a súa confianza no proxecto común europeo. “Podería dicirse entón que, xunto ao autogoberno do que nos dotou a democracia, ser partícipes activos nos distintos programas de Europa é o outro gran piar que explica o noso desenvolvemento nas últimas décadas”, dixo.
Converxencia coa media comunitaria e corrección da situación demográfica
Feijóo lembrou que hoxe Galicia conta cunha rede de seguridade que lle permite acceder a unha axuda transitoria para prolongar no tempo o efecto conseguido ata o momento cos fondos estruturais; e manter unhas taxas de cofinanciamento do 80%. “Máis de 4.000 millóns garantidos ata 2020, dos que máis de 2.500 serán xestionados pola Comunidade de forma directa, entre fondos estruturais (Feder e Fondo Social Europeo), fondos agrícolas (Feader) e fondos pesqueiros (Femp)”, afirmou.
Sobre este punto, o presidente da Xunta fixo fincapé en que estes fondos son unha garantía “para continuar co esforzo investidor que nos permita consolidar o proceso de converxencia coa media comunitaria; e, afrontar con maior compromiso un desafío fundamental para todo o continente, e vital en Galicia, como é a corrección da situación demográfica”.
“Para este dobre propósito os fondos europeos son unha garantía, pero tamén son unha responsabilidade que asumimos con determinación”, concluíu, reiterando o compromiso de Galicia de contribuír á cohesión de Europa: “Galicia fíxoo, estao a facer e farao”.
